ئێران: هیچ وادەیەک بۆ دانوستان لەگەڵ ئەمریکا دیاری نەکراوە

ئاڤا نیوز

وتەبێژی وەزارەتی دەرەوەی ئێران دووپاتیکردەوە، تاوەکو ئێستا هیچ وادەیەک بۆ دانوستانە ئەتۆمییەکانی نێوان تاران و واشنتن دیاری نەکراوە.

وێنە گەورەکە: دوای هێرشە ئاسمانییەکانی ئیسرائیل و ئەمریکا بۆ سەر دامەزراوە ئەتۆمییەکانی ئێران، واشنتن لە هەوڵەکانی بەردەوامە بۆ دەستپێکردنەوەی دانوستان لەگەڵ تاران، بەڵام ئێران دووپاتیکردەوە ناچێتە دانوستانێکەوە کە لە ئەنجامەکانی پشتڕاست نەبێت.

لێدوانی فەرمی: ئیسماعیل بەقائیی، وتەبێژی وەزارەتی دەرەوەی ئێران ڕایگەیاند: هیچ وادەیەک بۆ کۆبوونەوەی عەباس عێراقچی، وەزیری دەرەوەی ئێران و ستیڤ ویتکۆف، نێردەی تایبەتی دۆناڵد ترەمپ، سەرۆکی ئەمریکا دیاری نەکراوە.

هاوکات گوتیشی، بۆ ئێستا هیچ کات و شوێنێکی دیاریکراو سەبارەت بەم بابەتە دیاری نەکراوە، ئێمە دانوستامان لەگەڵ ئەمریکا دەکرد پێش ئەوەی ئیسرائیل مانگی ڕابردوو دەست بە هێرش بکاتە سەر دامەزراوە ئەتۆمییەکانمان.

لەلایەکی دیکەوە: بەقائیی دەڵێت، ناگەڕێینەوە بۆ دانوستانە ناڕاستەوخۆکان لەگەڵ ئەمریکا تا پێشوەختە لە دەرئەنجامەکانیان پشتڕاستمان نەکەنەوە.