بەڕێوەبەری بازرگانیی هەرێمی کوردستان: گرانبوونی نرخی ماسی کاتییە

ئاڤا نیوز

 

دوای ڕاگەیاندنی وەرزی قەدەغەکردنی ماسی لە سەرەتای مانگی ئادار، وردە وردە نرخی ماسی لە بازاڕەکانی کوردستان گرانبوو، بەڵام بەڕێوەبەری گشتیی بازرگانی دڵنیاییدا بەرزبوونەوەی نرخەکەی کاتییە.

 

وێنە گەورەکە: ڕۆژی پێنجی ئاداری ئەمساڵ وەرزی قەدەغەکردنی ڕاوە ماسی لە هەرێمی کوردستان ڕاگەیێنرا و تاوەکو 15ـی حوزەیران بەردەوام دەبێت؛ بەڵام لەگەڵ هاتنی مانگی ڕەمەزان خواست لەسەر ماسی زۆر بووە و بەمەش کەمێک نرخەکەی گرانتر بووە.

 

لێدوانی فەرمی: پشتیوان عوسمان، ماسی فرۆشە و لەبارەی گرانبوونی نرخەکەیەوە بە ئاڤا نیوزی گوت: "نرخی ماسی پێش قەدەغەکردنی وەرزی ڕاوکردن شەش هەزار دینار بوو، بەڵام ئێستا گرانبووە و لە هەندێک شوێندا نۆ هەزار دیناری تێپەڕاندووە".

 

لەلایەکی دیکەوە: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا نیوزی گوت: "لە پاڵ ڕاگەیاندنی وەرزی قەدەغەکردن و زیادبوونی خواست لەسەر ماسی، کەمکردنەوەی هاوردە لە وڵاتانی دراوسێ کاریگەریی لەسەر بەرزبوونەوەی نرخەکەی هەبووە بەڵام کاتییە".