ئاڤا پیاوێکی دەنگ خۆش لەسەر شەقام و پاڕکەکان دەباتە ماڵی بەساڵاچوان

ئاڤا نیوز

ئاڤا پیاوێکی دەنگ خۆش و بە تەمەن لەسەر شەقام و پارکەکان دەباتە ماڵی بەساڵاچوان، ئەویش سوپاسی حکومەت و ئاڤا میدیا دەکات و دەڵێت، "ژیانی منتان گۆڕی".

چیرۆکی سەرەکی: ئازاد، پیاوێکی تەمەن 52 ساڵ لە هەولێر بەهۆی کێشەی خێزانییەوە لە ماڵ و منداڵەکەی دوورکەوتووەتەوە و ماوەیەکە لەسەر شەقام و لەنێو پارکی باغی شار دەمێنێتەوە. خانەی بە ساڵاچووان بەهانایەوە دەچێت و لەنێو خانەکەدا شوێنی حەوانەوەی پێ دەدات و خزمەتی دەکات.

زانیاریی پەیامنێر: ئەو پیاوە بە تەمەنە جگە لەوەی بێ لانەیە، بەڵام دەنگێکی زۆر خۆشی هەیە و گۆرانییەکانی حەسەن زیرەک و ماملێ زۆر دەڵێتەوە، هەر بۆیە وەک خۆی دەڵێت بە ئازاد زیرەک ناسراوە،  لەداخی دڵە پڕەکەشی گۆرانیەک بۆ هیشام سەعید، پەیامنێری ئاڤا میدیا دەڵێت.

هۆکارە زانراوەکان: ئازاد لە هاوسەرەکەی جیا بۆتەوە و خاوەنی حەوت منداڵە، بەهۆی کێشەی خێزانییەوە بێ ماڵ ماوەتەوە، ئەو دەڵێت: شەوانە لەترسی ئاژەڵ و سەگ دەجار دەخەوم و هەڵدەستم، هیچ مورتاح نیم، بۆیە تەنها داوای بەهاناوەچوونی حکومەت دەکەم بۆ ئەوەی لەسەر شەقامەکان ڕزگارم ببێت. 

هیشام سەعید، پەیوەندی بە سەنگەر جەمال، بەڕێوەبەری ماڵی بەساڵاچوانی هەولێر دەکات و بارودۆخەکەی تێدەدەگەیەنێت، ئەویش دەڵێت: هەمیشە ماڵی بەساڵاچوان وەک شوێنێکی حکومی بۆ کەسە بێلانەکان ماڵە و با بفەرموێت بێتە لای ئێمە بە باشترین شێوە خزمەتی دەکەین.

دوای ئەوەی ئازاد دەچێتە ماڵی بەساڵاچوان، قسەی بۆ ئاڤا کردۆتەوە و سوپاسی ئاڤا و ماڵی بەساڵا چووان دەکات، زۆریش دڵخۆشە بە ماڵە نوێیەکەی، ئەو دەڵێت: بەڕاستی ئاڤا سوپاستان دەکەم ژیانی منتان گۆڕی.