تەقینەوەیەک لە کێڵگەیەکی نەوتی دهۆک ڕوویدا

ئاڤا نیوز

بەیانی ئەمڕۆ سێشەممە تەقینەوەیەک لە کێڵگەییەکی  نەوتی لە سنووری پارێزگای دهۆک ڕوویدا و بەهۆیەوە ئاگرێکی گەورە کەوتەوە. هێشتا نازانرێت ئاگرەکە بەهۆی هێرشی درۆنی بووە یاخود هۆکاری دیکە.

وێنە گەورەکە: ماوەیەکە ژێرخانی نەوتی هەرێمی کوردستان بە درۆن دەکرێتە ئامانج، بەڵام هێشتا هیچ ڕاگەیێنراوێکی فەرمی نییە، ئاماژە بەوە بکات ئەوەی لە کێڵگە نەوتییەکە ڕوویداوە بەهۆی هێرشی درۆنی بوبێت.

زانیاریی بەدەستهاتوو: ئاڤا میدیا زانیویەتی ئەو ئاگرەی کەوتووەتەوە لە کێڵگەیەکی گوندی ملبرکێی ناحیەی چەمانکێ بووە و هێشتا نازانرێت ئەوەی ڕوویداوە بە چ هۆکارێک بووە.

لەلایەکی دیکەوە: کۆمپانیای HKN ENERGYـی ئەمریکی لە ڕاگەیێنراوێکدا ئەمەیان بڵاوکردوەتەوە: کاتژمێر 7:00ـی  بەیانی ئەمڕۆ سێشەممە تەقینەوەیەک لە کێڵگەی نەوتی سەرسنگی پارێزگای دهۆک ڕوویدا و ئاگرێکی گەورەی لێ کەوتووەتەوە و هێشتا کۆنتڕۆڵ نەکراوە، بەڵام هەموو کارمەندانی کێڵگەکە سەلامەتن.

لە ڕاگەیێنراوی کۆمپانیاکە ئەوەش هاتووە، هەموو کارەکانی کێڵگەکە ڕاگیراون تا ئاگرەکە کۆنتڕۆڵ دەکرێت. لێکۆڵینەوە لە هۆکاری ڕووداوی ئاگرەکە دەستیپێکردووە.

ئەمەش بزانە: کێڵگەی نەوتی سەرسەنگ دەکەوێتە سنوری (پارێزگای دهۆک)، ڕووبەری کێڵگەکە (420) کیلۆمەتر دووجایە.

باکگراوند: دوێنێ شەویش دوو درۆن لە نزیک کێڵگەی نەوتی خورمەڵە کەوتنە خوارەوە و بەپێی ڕاگەیێنراوی دژە تیرۆری کوردستان هیچ زیانێکی بە کێڵگەکە نەگەیاندووە.