ئیسرائیل هۆشداری بە سووریا دەدات لە بەئامانجگرتنی درووزەکان

ئاڤا نیوز

وەزیری بەرگریی ئیسرائیل ڕایگەیاند، ئەو هێرشانەی سوپا کردیە سەر باشووری سووریا، هۆشدارییەکە بۆ ڕژێمی سووریا بۆ ئەوەی درووزەکان بە ئامانج نەگرێت.

وێنە گەورەکە: ماوەی سێ ڕۆژە شەڕ و ئاڵۆزی لە نێوان درووزەکان و هێزە ئەمنییەکانی سووریا بەردەوامە و تا دێت دۆخەکە خراپتر دەبێت، ئیسرائیل هۆشدارییەکی توند بە سووریا دەدات لەوەی چیتر درووزەکان بە ئامانج نەگرێت.

لێدوانی فەرمی: یسرائیل کاتز، وەزیری بەرگری ئیسرائیل ڕایگەیاند: هێرشەکانی ئیسرائیل پەیامێکی ئاشکرایە و هۆشداریێکە بۆ دەسەڵاتدارانی سووریا، ئێمە ڕێگە نادەین زیان بە درووزەکانی ناو سووریا بگات، ئیسرائیل بێدەنگ نابێت و ناوەستێت.

ئەوەی پێویستە بیزانیت: ئەم هۆشدارییەی ئیسرائیل لە کاتێکدایە کە دوێنێ سوپای ئیسرائیل چەند تانکێکی هێزە ئەمنییەکانی سووریای لە پارێزگای سوەیدا بە ئامانج گرتووە وەک خۆیان دەڵێن، ئەو کەرەستە سەربازییانە مەترسی و هەڕەشە بوون بۆ سەر دەوڵەتی ئیسرائیل.

زانیاریی زیاتر: بەهۆی ئاڵۆزییەکانی نێوان درووز و هێزە ئەمنییەکانی سووریا لە ماوەی سێ ڕۆژدا 99 کەس لە هەردوو لا کوژران و سەدان کەسیش برینداربوون.