وەزیرانی پارتی بەشداریی کۆبوونەوەی ئەنجوومەنی وەزیرانیان کردووە

ئاڤا نیوز


کۆبوونەوەی ئەنجوومەنی وەزیرانی عێراق بەڕێوەچوو و بەگوێرەی زانیاریی پەیامنێری ئاڤا، وەزیرانی پارتی بەشدارییان لەو کۆبوونەوەیەدا کردووە.

چیرۆکی سەرەکی: نزیک دەبێتەوە لە سێ مانگ ڕاگرتنی مووچە و شایستە داراییەکانی هەرێمی کوردستان لەلایەن بەغداوە بووەتە کێشەیەکی هەڵواسراوی نێوان هەردوو حکومەتی فیدراڵی و حکومەتی هەرێمی کوردستان، تاوەکو ئێستا چارەسەرێكی ڕیشەی بۆ ئەو پرسە نەدۆزراوەتەوە هەرێم لە چاوەڕوانی ڕێكکەوتنێکی نوێدایە لەوبارەیەوە. 

چی ڕوودەدات: ئەمڕۆ سێشەممە، کۆبوونەوەی ئەنجوومەنی وەزیران بە سەرپەرشتیی محەممەد شیاع سوودانی بەڕێوەچوو، بڕیاربوو لە کۆبوونەوەی ئەمڕۆدا پرسی مووچەی مووچۆرانی هەرێمی کوردستان یەکلایی بکرێتەوە.

زانیاریی فەرمی: دەروون مەلا ناجی، پەیامنێری ئاڤا لە بەغدا ڕایگەیاند، لە کۆبوونەوەی ئەمڕۆی ئەنجوومەنی وەزیرانی عێراق، وەزیرانی پارتی دیموکراتی کوردستان بەشدارییان کردووە. 

بەتەنیشت ئەم بابەتەوە: شەوی ڕابردوو کۆبوونەوە چاوەڕوانکراوەکەی سەرکردەکانی شیعە لە بەغدا کرا، بەپێچەوانەی ئەوەی چاوەڕوان دەکرا، لێدوان و بڕیاری ئەرێنی لەبارەی پرسی مووچەی خەڵکی کوردستان بدەن، هاوشێوەی ڕابردوو جەختیان لەسەر کۆمەڵێک مەرج بۆ ناردنی مووچە کردووەتەوە. دووپاتیشی دەکەنەوە، گفتوگۆکان لەگەڵ هەولێر بەردەوام دەبن و ڕەنگە لەداهاتوودا چارەسەرێک بدۆزرێتەوە. 

پەیوەست بەم بابەتەوە: لەبارەی هەڵوێستی پارتی بەرامبەر بەغدا، پێشتر بارەگای بارزانی ڕایگەیاند، کەسایەتییە سیاسییەکان و حکومەتی فیدراڵی بەڵێنی چارەسەرکردنی پرسی ناردنی مووچە و شایستە داراییەکانی هەرێمی کوردستان لە چەند ڕۆژی داهاتوو دەدەن، بۆیە دوا دەرفەت بە حكومەتی فیدراڵ دەدەین، بۆ ئەوەی ڕێگەیەک بۆ کۆتایهێنان بەم کێشەیە بدۆزنەوە.