بەهۆی زیادکردنی بڕگەیەکەوە پەرلەمانتارانی کورد و سوننە هۆڵی پەرلەمانیان جێهێشت

ئاڤا نیوز

بەهۆی زیادکردنی بڕگەی تایبەت بە یاسای حەشدی شەعبی، پەرلەمانتارانی کورد و سوننە هۆڵی پەرلەمانیان جێهێشت و بایکۆتی دانیشتنەکەیان کرد، و یاساکەش خوێندنەوەی دووەمی بۆ کرا.

چیرۆکی سەرەکی: ئەنجوومەنی نوێنەرانی عێراق ئەمڕۆ چوارشەممە دانیشتنی ژمارە دووی خۆی لە وەرزی دووەمی یاسادانان دەستپێکرد، کە بڕیاربوو لە دانیشتنەکە دەنگ لەسەر دوو پڕۆژەیاسا و خوێندنەوەی دووەم بۆ چوار پێشنیاز و پڕۆژەیاسای دیکە بکات.

چی ڕوویدا: لەسەر داوای فراکسیۆنە شیعییەکان بڕگەی خوێندنەوەی دووەم بۆ یاسای دەستەی حەشدی شەعبی بۆ کارنامەی دانیشتنەکە زیاد کرا و خوێندنەوەی دووەمی بۆ کرا، ئەمەش نیگەرانی لایەنە سوننی و کوردییەکانی لێکەوتەوە، جگە لە نەوەی نوێ سەرجەم فراکسیۆنەکانی دیکەی کورد هۆڵی پەرلەمانیان جێهێشت.

ئەوەی ئێستا ڕوودەدات: سەرۆکی پەرلەمان و جێگری یەکەم و سەرۆکی فراکسیونەکان سەردانی دکتۆر شاخەوان، جێگری سەرۆکی پەرلەمانیان کرد بۆ ئەوەی لە دانیشتنەکە ئامادە بن.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند، دکتۆر شاخەوان، جێگری سەرۆکی پەرلەمان ئەوەی بە سەرۆک و جێگری سەرۆک و سەرۆکی فراکسیۆنە شیعەکانی گوتووە کە ئەوان بەشداری دانیشتنێک ناکەن کە تێیدا ئەو یاسایانە تێپەڕێنرێت کە لە بەرژەوەندی ئەوان بێت و خەڵکی کوردستانیش بێ مووچە بن. هەر دوای ئەمەش ڕاستەوخۆ باڵەخانەی پەرلەمانی جێهێشت.

ئەوەی پێویستە بیزانیت: پەرلەمانی عێراق لە ڕۆژی 2025-3-24، خوێندنەوەی یەکەمی بۆ پرۆژەیاسای دەستەی حەشدی شەعبی کرد. پرۆژەیاساکە لە 18 ماددە پێکهاتووە و تێیدا ڕێکخستەنەوەی حەشد، مۆڵەت، دەرماڵە، پلە بەرزکردنەوە و خانەنشینی لەخۆ دەگرێت.