فایلی خەڵک؛ ئاڤا بەدواداچوون بۆ گرفتی کەمئاویی چەند پڕۆژەیەکی هەولێر دەکات

ئاڤا نیوز

لە قۆناغی یەکەمی پرۆژەی فریاگوزاریی خێرای ئاوی هەولێر، ژمارەیەك گەڕەكی دەوروبەری شەقامی كۆیە لە هەولێر سوودمەند بوون، چەند گەڕەكێکیش هەن هێشتا سوودمەند نەبوونە، یەكێك لەوانە گەڕەکی گرووپی ئەندازیارانە و تاوەكو ئێستا گرفتی كەمئاویان هەیە.

چیرۆکی سەرەکی: گەڕەکی گرووپی ئەندازیاران لە نزیک کەسنەزانە و نزیکەی هەزار ماڵ دەبن، لە پڕۆژەی فریاگوزاریی خێرای ئاوی هەولێر سوودمەند نەبوونە، کۆمپانیای سەرپەرشتیاری پڕۆژەكە ڕۆژانە ئاو بە تانکەر بۆ دانیشتووانەكەی دابین دەکات، چونکە هەرسێ بیری پڕۆژەکە نزیکن لە وشکبوون.

بەدواداچوونی ئاڤا: بەپێی بەدواداچوونی ئاڤا، هەر گرووپی ئەندازیاران نییە، بەڵكو دانیشتووانی زۆرینەی سیتییەكان پرسیاریی ئەوەیان هەیە کە بۆچی پڕۆژەکە بە ئەوان نەگەیشتووە و میکانیزمی دابینکردنی ئاو بۆ ئەوان چۆنە.

لێدوانی فەرمی: ڕابەر حوسێن، بەڕێوەبەری ئاوی هەولێر پێی ڕاگەیاندین، هەر پڕۆژەیەکی نیشتەجێبوون بیەوێت لە پڕۆژەکە سوودمەند بێت، دەبێت هاوبەشی بکات و پێوەری ئاو ببەستێت، چونکە ئەو پڕۆژانە لە پارەی خزمەتگوزاری پارەی ئاویش وەردەگرن، بەڵام دەبێت پارەی ئاو بۆ حکومەت بێت نەك بۆ پڕۆژە.

لەلایەکی دیکەوە: کۆمپانیای خزمەتگوزاری ئەو گرووپە بە ئاڤای وت، "تا ئەو کاتەی پڕۆژەی ئاوی خێرا دەگات، بەدابینکردنی ئاو لەڕێگەی تانکەر قەرەبووی ئاوی بیرەکان دەکەینەوە، لەگەڵ جێبەجێکردنی قۆناغی دووەم لە پڕۆژەکە سوودمەند دەبن، ئەگەر ڕێکارەکانی هاوبەشیکردن نێوان پرۆژەکە و بەڕێوەبەرایەتی ئاوی هەولێر جێبەجێ بکرێت."