لە هەولێر 14 هەزار فەرمانبەری دیکە زەوییان پێدەدرێت

ئاڤا نیوز

بڕیارە ئەمڕۆ لە هەولێر قۆناغی دووەمی دابەشکردنی زەوی بەسەر فەرمانبەران بەڕێوەبچێت و تیروپشک بۆ 14 هەزار ناوی دیکەی فەرمانبەران بکرێت.

وێنە گەورەکە: لە سنووری سەرۆکایەتی شارەوانی هەولێر، کە شارەوانییەکانی سەنتەری شاری هەولێر دەگرێتەوە، نزیکەی 70 هەزار فەرمانبەر و پێشمەرگە و خانەنشین سوودمەند دەبن لە وەرگرتنی زەوی، لە قۆناغی یەکەم سێ هەزار پارچە زەوی بەسەر فەرمانبەران دابەش کران، بڕیارە ئەمڕۆش لە قۆناغی دووەم 14 هەزار فەرمانبەری دیکە زەوییان پێبدرێت.

ڕاگەیێنراوی فەرمی: سەرۆکایەتی شارەوانی هەولێر ڕایدەگەیەنێت، وەک قۆناغی دووەم تیروپشک بۆ  14 هەزار ناوی دیکەی فەرمانبەران ئەنجام دەدات کە چەند وەزارەت و دەستەو فەرمانگەیەکی حکومەت دەگرێتەوە.

لێدوانی فەرمی: کارزان عەبدولهادی، سەرۆکی شارەوانی هەولێر بە ئاڤا میدیای گوت:  لە هەولێر ئەو زەوییانەی ئامادەکراون بۆ دابەشکردن بەسەر فەرمانبەران کەوتوونەتە نێو ماستەرپلانی هەولێر و لەسەر ڕێگای هەولێر - دهۆکن، ئەو شوێنانە لەسەر ژمارەیەک بنەمای گونجاو بۆ نیشتەجێبوون و گەیاندنی خزمەتگوزاری دەستنیشان کراون.