ئەنجوومەنی پارێزگای واست بەڕێوەبەرانی شارەوانیی  و سەلامەتیی پیشەیی کوت لەکارەکانیان ڕادەگرێت

ئاڤا نیوز

ئەنجوومەنی پارێزگای واست بڕیاریدا قوربانییانی کارەساتی شاری کوت وەک "شەهید" لەقەڵەم بدات و هەریەکە لە بەڕێوەبەری شارەوانیی کوت و بەڕێوەبەری سەلامەتیی پیشەیی لە کارەکانیان ڕابگرێت، ئەنجوومەنی وەزیرانیش قەرەبووی کەس و کاری قوربانییان دەکاتەوە. 

چیرۆکی سەرەکی: شەوی 16-7-2025 لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە، بەپێی ئاماری وەزارەتی تەندروستیی عێراقش، بەهۆیەوە، 61 کەس گیانیان لەدەست داوە و 42 کەسی دیکەش برینداربوون.

زانیاریی بەدەستهاتوو: ئەنجوومەنی پارێزگای واست لەدانشتنێکی نائاساییدا، بڕیاریدا هەموو ماف و ئیمتیازاتی شەهید بە قوربانییانی کارەساتی شاری کوت ببەخشێت و وەک "شەهید" پێناسەبکرێت.

له‌هه‌مان كاتدا:  ئەنجوومەنی پارێزگای واست هەریەکە لە بەڕێوەبەری شارەوانیی کوت و بەڕێوەبەری سەلامەتیی پیشەیی لە کارەکانیان ڕاگرت تاوەکو لێکۆڵینەوەکان کۆتاییان دێت.

ئەمەش بزانە: ئەنجوومەنەکە بڕیاریدا بە پێکهێنانی لیژنەی پسپۆڕ لە سەرجەم قەزا و ناحیەکاندا، بەمەبەستی پشکنینی هەموو فەرمانگە و باڵەخانەکان بۆ دڵنیابوونەوە لە جێبەجێکردنی مەرجەکانی سەلامەتیی پیشەیی و خۆپارێزی.

لەلایەکی دیکەوە: ئەنجوومەنی وەزیرانی عێراق لەدانیشتنی نائاسایی ڕۆژی پێنجشەممە 17-7-2025 بڕیاریدا، قەرەبووی ماددی خێزان و کەس وکاری قوربانییانی ئاگرەکە بکاتەوە بەبڕی 10 ملیۆن دینار بۆ هەر قوربانییەک.