گوندێكی زوممار دوای 40 ساڵ دەردەكەوێتەوە

ئاڤا نیوز

گوندێكی دێرینی سەر بە قەزای زوممار لە پارێزگای نەینەوا كە زیاتر لە 40 ساڵە ئاوی بەنداوی مووسڵ دایپۆشتبوو، ئێستا بەهۆی دابەزینی ئاستی ئاوی بەنداوەكە، دەردەكەوێتەوە.

چیرۆكی سەرەكی: ئەو گوندەی زوممار، دوای دروستكردنی بەنداوی مووسڵ لەسەر ڕووباری دیجلە، لە ساڵی 1985ـەوە ژێرئاو كەوتبوو، دوای دەركەوتنەوەی گوندەكە، دانیشتووانەكەی سەردانی گوندە نێژراوەكەیان دەكەنەوە بۆ بینینی قوتابخانە و خانووەكانی كە هەگبەی یادگارییەكانی سەردەمی منداڵییانە.

لێدوانی فەرمی: ئەحمەد ئەلبڕ، نووسەرێكی خەڵكی گوندە ژێرئاوكەوتووەكە قسەی بۆ ئاژانسی ئەسۆشیەیتید پرێس كردووە و دەڵێت، "پێش هەفتەیەك ئەم ناوچەیە بەمشێوەیە دەرنەكەوتبوو، ئەو ئاوەی توركیا بەردی دەداتەوە زۆر كەمە، لە هەمان كاتیش ئەو بڕە ئاوە كۆگاكراوەی لێرەوە بۆ شارەكانی دیكەی عێراق بەردەدرێتەوە، زۆرە، ئەمەش وایكردووە ناهەوسەنگی لەنێوان بڕی ئاوی بەدەستهاتوو و خەرجكراودا هەبێت و ئاستی ئاوی دەریاچەكەی بەو ڕێژە زۆرە دابەزاندووە، ئەوەش زیانێكی زۆری لە كشتوكاڵ داوە، سامانی ماسیش كەمبووەتەوە."

پەیوەست بەم بابەتە: ئەحمەد محەممەد، چالاکوان و بەڕێوەبەری قوتابخانەیەكی بنەڕەتی لە زوممار ڕایدەگەیەنێت، "توركیا ئاوی لەسەرمان گرتووەتەوە و بەری ناداتەوە، ئێستا دەیان گوندی ئەم ناوچەیە ئاو بۆ ئاودێریی زەوییە كشتوكاڵییەكانی ناچێت. ئاژەڵداری و ڕاوەماسیش نەماوە كە سەرچاوەی بژێوی خەڵك بوون."

هۆكارە زانراوەكان: ڕووباری دیجلە و بەشێك لە زێ و جۆگەكانی پارێزگای نەینەوا، سەرچاوەی دابینكردنی ئاوی بەنداوی مووسڵن، شارەزایان بۆچوونیان وایە، گرتنەوەی ئاوی ڕووباری دیجلە لە توركیا لە پاڵ كەمبوونەوەی ڕێژەی بارانبارین، هۆكاری سەرەكین بۆ كەمبوونەوەی ئاستی ئاوی دەریاچەكە، ئەوە لەكاتێكدا پێشووتر بەنداوی مووسڵ ئاسایشی ئاوی ڕووباری دیجلەی بۆ سەرجەم شارەكانی ناوەڕاست و باشووری عێراق زامن كردبوو.

باكگراوند: بەنداوی مووسڵ گەورەترین بەنداوی عێراقە و یەکێکە لە گەورەترین بەنداوەکانی ڕۆژهەڵاتی ناوەڕاستیش، جگە لە سوودەكانی بۆ ئاودێری، وزەی كارەباش بۆ ناوچەیەكی فراوان دابین دەكات.