نەتەوەیەكگرتووەكان كەشتی ڕووبیمار لە دەریای سوور دەردەهێنێتەوە

ئاڤا نیوز

بۆ ئەوەی ژینگەی دەریای سوور زیاتر پیس نەبێت و تووشی ژەهراویبوون نەبێت، نەتەوەیەكگرتووەكان لە هەوڵی دەرهێنانەوەی كەشتی ڕوبیماردایە.

چیرۆکی سەرەکی: كەشتی بارهەڵگری ڕووبیمار 21 هەزار تۆن ماددەی كیمیایی پێبوو، 3ی ئەم مانگە لە ئاوە قووڵەکانی ناوچەیەکی نێوان یەمەن و ئەریتریا کە 20 كیلۆمەتر لە بەندەری مۆخای یەمەنەوە دوورە، دوای دوو هەفتە لە پێكانی بە مووشەك لەلایەن حووسییەكانەوە نووقم بوو.

ڕاگەیەنراوی فەرمی: ماتیا لۆجا، نوێنەری نەتەوەیەكگرتووەكان دەڵێت: 16 پسپۆری نێودەوڵەتی بواری ئەندازیاری ژینگە و ڕژانی نەوت و كانزاكان ئامادەكاری دەكەن بۆ دەرهێنانەوەی كەشتییەكە و چۆنیەتی میكانیزمەكەی تاوتوێ دەكەن.

زانیاریی زیاتر: پرۆسەی دەرهێنانەوەی کەشتییە نوقمبووەکە ڕووبەڕووی ئاستەنگی گەورە دەبێتەوە، بۆیە “نەتەوەیەکگرتووەکان بەنیازە ژێردەریایییەکی ئەلیکترۆنی بکڕێت، بەمەبەستی شیکردنەوەی دۆخەکە و تێگەیشتن لە کارەساتەکە بەشێوەیەکی قووڵتر.

ئەوەی پێویستە بیزانیت: كەشتییەكە نزیكەی 40 كیلۆمەتری دەوروپشتی بەهۆی ڕاژنی ماددەكانی ناویەوە پیس کردووە، ئەمەش مەترسیی گەورەی لەسەر دەریای سوور دروست كردووە، كە ئەگەری هەیە زیانی گەورە دروست بكات.