فەرماندەیەکی حەشدی شەعبی شوێنی ئاراستەکردنی درۆنەکان بۆ ئاڤا ئاشکرا دەکات

ئاڤا نیوز

فەرماندەیەکی حەشدی شەعبی شوێنی ئاراستەکردنی درۆنەکان بۆ سەر کێڵگە نەوتییەکانی هەرێمی کوردستان بۆ ئاڤا ئاشکرا دەکات و دەڵێت، درۆنەکان لە دەرەوەی عێراق دروست کراون و لە بیابابەناکی جەزیرەی نەینەواوە ئاڕاستە کراون.

وێنە گەورەکە: هێرشە درۆنییەکان مەترسییەکی ڕاستەقینە و گەورە و ئامانجدارن بۆ سەر هەرێمی کوردستان، بەتایبەت  کە ئاراستەی فڕۆکەخانەکان و کێڵگە نەوتییەکان دەکرێن، دەرخەری ئەوەن جگە لە فشارە سیاسییەکان، هەوڵەکە بۆ لاوازکردنی قەوارەی هەرێمی کوردستان و سەرچاوە داراییەکانیەتی.

لێدوانی فەرمی: فەرماندەیەکی حەشدی شەعبی بە ئاڤای وت، "باڵیۆزخانەی ئەمریکا لە بەغدا و هاوپەیمانان ڕاپۆرتیان داوە بە سوودانی و وتوویانە، درۆنەکان لە نێوان تەپۆڵکەکانی بەعاج و بیابانی حەزەر بەرەو ڕێگەی بەغدا، ئاڕاستەکراون بەرەو کوردستان".

زانیاریی زیاتر: لەسەر بنەمای ئەو ڕاپۆرتانە هێزە ئەمنییەکان و حەشدی شەعبی ئۆپەراسیۆنێکیان بۆ کێوماڵکردنی ئەو ناوچانە کردووە، لەو ناوچانە کامێرایان داناوە لەگەڵ سێ ڕادار، نزیکەی 60 کیلۆمەتر چوارگۆشەیان پشکنیوە بەڵام هیچیان نەدۆزیوەتەوە.

لەلایەکی دیکەوە: بەپێی زانیارییەکانی ئاڤا، ئەمریکا پەیامی تووندی داوەتە حکومەتی عێراق چیتر بەرگەی ئەو بارودۆخە ناگرن، نایانەوێت مەترسی بۆ سەر کۆمپانیا ئەمریکییەکان دروست ببێت لە هەرێمی کوردستان و دەبێت هێرشەکان بووەستێنرێن.

بە تەنیشت ئەم هەواڵەوە: ئاڤا زانیویەتی دوو ڕۆژە شاندێکی وەزارەتی نەوتی عێراق (کۆمپانیای سۆمۆ و کۆمپانیای نەوتی باکوور) ئێستا لە هەولێرە و یەکێک لە ئەرکەکانیان لێکۆڵینەوە و هەڵسەنگاندنە بۆ زیانی هێرشە درۆنییەکان و ڕاپۆرتێکی ورد لەمبارەیەوە ئامادە دەکەن و ئاراستەی سوودانی و ئەنجوومەنی وەزیرانی عێراقی دەکەن.

باکگراوند: لەدوای کۆتاییهاتنی جەنگی ئیسرائیل و ئێران لە کۆتایی مانگی ڕابردوو، بەردەوام هێرشی درۆنی دەکرێنە سەر هەرێمی کوردستان، لە چەند ڕۆژی ڕابردووشدا ئاراستەی زیاتری هێرشەکان بۆ سەر کێڵگە نەوتییەکان بوو، بەم هۆیەوە بەشێک لە کێڵگەکان زیانێکی زۆریان بەرکەوتووە و بەرهەمهێنانی نەوتیان ڕاگرت.