زیاتر لە 20 هەزار زیندانیی سیاسی کارەکانیان تەواو بووە و مینحەیان بۆ نەبەستراوە

ئاڤا نیوز

زیاتر لە 20 هەزار زیندانی سیاسی هەرێمی کوردستان لە چاوەڕیی وەرگرتنی مینحەن و، بەڕێوەبەری گشتیی خزمەتگوزاریی کەسوکاری شەهیدان و ئەنفالکراوانیش دەلێت کار بۆ ئەوە دەکەین دۆسیەکانیان بگوازینەوە بەغدا.

چیرۆکی سەرەکی: لیستەکانی 9 تا 15ـی زیندانییانی سیاسی هەرێمی کوردستان، ژمارەیان 20 هەزار و 591 کەسە، ڕێکارەکانی مامەڵەیان تەواو کردووە، بەهۆی کێشەی دارایی و تەرخان نەکردنی پارە لە بودجەی عێراق بۆ ساڵەکانی 2023 و 2024 و 2025، نەتوانرا مینحەیان بۆ تەرخان بکرێت.

لێدوانی فەرمی: ئەحمەد مام ڕەسووڵ، بەرێوەبەری گشتیی خزمەتگوزاریی کەسوکاری شەهیدان و ئەنفالکراوان بە ئاڤا میدیای گوت، بە دوو ئاڕاستە لەسەر ئەم بابەتە کار دەکەین:

یەکەم: ئامادەکاریمان کردووە لە بودجەی پیشنیازکراوی ساڵی 2026ــی هەرێمی کوردستان جارێکی دیکە ناوی ئەو زیندانیە سیاسیانە بچەسپێنین.

دووەم: دوای وەرگرتنی ڕەزامەندی ئەنجوومەنی هەرێمی کوردستان کار لەسەر ئەوە دەکەین لە هەمواری یاسای زیندانییانی سیاسیی عێراق جێگەی زیندانیی سیاسیی هەرێمی کوردستان بکەینەوە و دۆسیەکانیان بگوازینەوە سەر دەزگای زیندانییانی سیاسیی عێراق، بۆ ئەوەی هەموو ئەو ماف و ئیمتیازاتانەی لە عێراق بۆ زیندانییانی سیاسی هەن، هەرێمی کوردستانیش بگرێتەوە.

زانیاریی زیاتر: ئەحمەدی مام ڕەسووڵ زیاتر دەڵێت: ئەم هەفتەیە جارێکی دیکە لەگەڵ لیژنەی شەهیدانی پەرلەمانی عێراق کۆدەبینەوە، ڕا و پێشنیازەکانی هەرێمی کوردستانیان ئاراستە دەکەین، لەگەڵ دەزگای زیندانیانی سیاسیی عێراقیش لە گفتوگۆی بەردەوامین.