جۆرە مێروویەک هەڕەشەی لەناوبردن لە ترێی دهۆک دەکات

ئاڤا نیوز

جۆرە مێروویەک لەناو بەشێک لە ڕەزەکانی ناوچەیەکی دهۆک بڵاوبووەتەوە و بووەتە هەڕەشە لەسەر لەناوبردنی بەرهەمی ترێ، کشتوکاڵی دهۆکیش دەڵێت لەهەوڵی دابینکردنی چارەسەری نەخۆشیەکەین.

چیرۆکی سەرەکی: جۆرە مێروویەک بەڕێژەیەکی زۆر لە گوندی بەرێ بوهارە لە ناو ڕەزەکانی ناوچەیەکی دهۆکدا بڵاوبووەتەوە، زیانێکی زۆری بە بەرووبوومی ترێی جووتیارانی ناوچەکە گەیاندووە، مێرووەکە ئاو و ڤیتامینی قەدی دارەکان دەخوات و وادەکات ترێیەکی بچووکی خراپ بەرهەمبێت کە بەکەڵکی خواردن نایەت.

ئەم گوندە بە ترێی تام خۆش و ئاودار بەناوبانگە، بەڵام ئەمساڵ ئەم مێرووە ئەو ناوبانگەی ترێی گوندەکەی تێکداوە.

لێدوانی فەرمی: جووتیارێکی گوندەکە بە ئاڤای وت، "ئەو مێرووە ترێی ئەمساڵی ئێمەی فەوتاند، دەچێتە قەدی دارەکەوە، ناهێڵێت ئاو بگاتە لقەکانی و بەهۆیەوە ترێیەکی خراپی دەنک ورد دەگرێت، کە هیچ بەکەڵکی خواردن نایەت".

ئەو جووتیارە داوا لە کشتوکاڵی دهۆک دەکات هاوکارییان بکات و دەرمانی پێویستیان بۆ دابین بکات تاوەکو لەوە زیاتر تووشی زیان نەبن.

بۆچوونی لایەنی بەرامبەر: مسلیح حەسەن، جێگری بەڕێوەبەری گشتی کشتوکاڵی دهۆک بە ئاڤای وت، "ئاگاداری نەخۆشییەکەین، ئێستا لە هەوڵی دابینکردنی چارەسەر و پێداویستییەکانین بۆ جووتیاران".