ئەمریکا: پێشوازی لە ڕێککەوتنی نوێی نێوان هەولێر و بەغدا دەکەین

ئاڤا نیوز

سەرۆك بارزانی و هەڵسووڕێنەری كاروباری باڵیۆزخانەی ئەمەریكا لە عێراق پرسی ڕێککەوتنی نێوان هەولێر و بەغدا لەسەر شایستە داراییەکان و مووچە و چەند پرسێکی دیکەیان تاوتوێ کرد.

چیرۆکی سەرەکی: ڕۆژی شەممە، لە سەڵاحەددین سەرۆك بارزانی پێشوازی لە باڵیۆز ستیڤن فەیگن، هەڵسوڕێنەری كاروباری باڵیۆزخانەی ئەمەریكا لە عێراق كرد، هاوکات ستیڤن بیتنەر كونسوڵی گشتیی ئەمەریكا لە هەولێر ئامادەی دیدارەکە بوو.

ڕاگەیێنراوی فەرمی: بارەگای بارزانی ڕایگەیاند: هەڵسوڕێنەری كاروباری باڵیۆزخانەی ئەمەریكا لە عێراق، وێڕای ئاماژەدان بۆ ڕۆڵی هەرێمی كوردستان لە سەقامگیریی عێراق و ناوچەكە جەختی لەوە كردەوە كە وڵاتەكەی خوازیاری هەرێمی كوردستانی بەهێزە و سەقامگیریی هەرێمی كوردستان لە بەرژەوەندیی هەموو لایەكە

هەڵسوڕێنەری كاروباری باڵیۆزخانەی ئەمەریكا لە عێراق، پێزانینی بۆ ڕۆڵی سەرۆک بارزانی لە پاڵپشتی پرۆسەی ئاشتی لە تورکیا و نزیککردنەوە و پتەوکردنی یەک گوتاری لایەنە کوردییەکانی لە سووریا دەربڕی.

لەبەرامبەردا: سەرۆك بارزانی ڕایگەیاند، پڕۆسەی چارەسەری ئاشتی لە توركیا، لە بەرژەوەندیی هەموو لایەك و ناوچەكە و ئێمەیە، بە هەموو توانایەك پاڵپشتی دەکەین و ئەوەی پێویست بێت بۆ سەرخستنی پرۆسەکە ئەنجامی دەدەین.

زانیاریی زیاتر: هەنگاوەكانی پێكهێنانی كابینەی دەیەمی حكومەتی هەرێمی كوردستان، پەیوەندییەكانی نێوان حكومەتی هەرێم و حكومەتی فیدراڵ، تەوەرێكی تری دیدارەکە بوو.

شاندەکە بە سەرۆك بارزانی وت، ئەمەریكا پێشوازی لەو ڕێككەوتنە دەكات، كە لەنێوان هەردوو حكومەت لەسەر مووچە و شایستە داراییەكانی هەرێمی كوردستان لەئارادایە.