دانانی وەزیرێک بۆ پارێزگاری کەرکووک بە "نایاسایی" دادەنرێت

ئاڤا نیوز

لەلایەن سوودانییەوە هەوڵێک هەیە بۆ ئەوەی وەزیرێکی حکومەتی عێراق بەوەکالەت بکرێتە پارێزگاری کەرکووک، بەڵام ئەم هەنگاوە بەنایاسایی دادەنرێت.

چیرۆکی سەرەکی: لە دوایین دانیشتنی لەگەڵ لایەنە سیاسییەکانی کەرکووک، محەممەد شیاع سوودانی، سەرۆکوەزیرانی عێراق پێشنیازی کردووە وەزیرێکی کوردی کابینەکەی ڕابسپێرێت بەوەکالەت پۆستی پارێزگاری کەرکووک بەڕێوەببات.

لێدوانی فەرمی: ڕێبوار تاڵەبانی، سەرۆکی پێشووی ئەنجوومەنی پارێزگای کەرکووک بە ئاڤا نیوزی گوت، بەپێی یاسا دەبێت پارێزگار لە ئەنجوومەنی پارێزگا هەڵبژێردرێت و سەرۆکوەزیران تەنها پەسەندی دەکات، هەروەها دیاریکردنی پارێزگار لە دەسەڵاتی ئەودا نییە، بۆیە هەر بڕیارێکی لەوشێوەیە پێچەوانەی یاسای ئەنجوومەنی پارێزگاکانە.

 

لەلایەکی دیکەوە: قەحتان وەنداوی، بەرپرسی لقی کەرکووکی بەرەی تورکمانی عێراق بە ئاڤا نیوزی گوت، تاوەکو ئێستا بڕیارەکەمان بۆ نەهاتووە، هەر کاتێک بەدەستمان گەیشت ڕەتی دەکەینەوە، چونکە  بەپێی بڕیارەکە نایاساییە و لە دەسەڵاتی سەرۆکوەزیران نییە پارێزگار دیاری بکات.

بۆچی گرنگە: دوای تێپەڕبوونی زیاتر لە سێ مانگ بەسەر هەڵبژاردنی ئەنجوومەنی پارێزگاکانی عێراق، هێشتا پۆستی پارێزگاری کەرکووک یەکلایی نەکراوەتەوە، بەهۆی ئەوەی هەرسێ نەتەوە؛ کورد، عەرەب و تورکمان بە مافی خۆیانی دەزانن.