نێردەی ئەمریکا و فەرماندەی گشتیی هەسەدە دوا پێشهاتەکانی سووریا تاوتوێ دەکەن

ئاڤا نیوز

فەرماندەی گشتیی هێزەکانی سووریای دیموکرات و نوێنەری ئەمریکا لە سووریا کۆبوونەوە و تاوتوێی دۆخی ئێستای سووریایان کرد. هاوکات گفتوگۆیان لەبارەی هەنگاوە خێراکان بۆ گێڕانەوەی ئارامی و سەقامگیری سووریا کرد.

وێنە گەورەکە: نزیکەی هەفتەیەکە شەڕ و پێکدادانی نێوان خێڵە بەدەوییەکان و چەکدارانی درووز لە سوەیدای سووریا بەردەوامە و ئەمریکا لە نزیکەوە  چاودێری دۆخەکە دەکات. سەبارەت بە کەمکردنەوەی گرژییەکان، تۆماس باراک، نوێنەری تایبەتی ئەمریکا بۆ سووریا لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) کۆبووەوە.

ڕاگەیێنراوی فەرمی: باڵیۆزخانەی ئەمریکا لە سووریا بڵاویکردووەتەوە، لە کۆبوونەوەکەدا هەردوولا جەختیان کردووەتەوە لەسەر پێویستیی یەکڕیزی لەم کاتەدا و هەنگاوە کردارییەکانیان تاوتوێ کردووە بۆ یەکخستنی سووریا بە ئاراستەی داهاتوویەکی ئاشتیانە، خۆشگوزەران، گشتگیر و سەقامگیر بۆ هەموو سوورییەکان.

لە کۆبوونەوەکەدا تۆم باراک سوپاسی مەزڵووم عەبدی کرد بۆ سەرکردایەتیکردنی و هەروەها بۆ هاوبەشی بەردەوامی هێزەکانی سووریای دیموکرات لە شەڕی دژی داعش لە سووریا.