فایلی خەڵک؛ کارمەندانی ئاسایش چاوەڕێی وەرگرتنی زەوین

ئاڤا نیوز

دوای ئەنجامدانی تیروپشک بۆ سوودمەندانی وەرگرتنی زەوی لە هەولێر، کارمەندانی ئاسایش و پۆلیس داوا دەکەن ناوی ئەوانی تێدا نەبووە، سەرۆکی شارەوانی هەولێریش دەڵێت، دابەشکردنەکە بە قۆناغە و ناوی ئەوانیشی تێدا دەبێت.

چیرۆکی سەرەکی: هەفتەی پێشوو لە ڕێوڕەسمێکدا وەزارەتی شارەوانی،  تیروپشکی بۆ دابەشکردنی زەوی بەسەر 14 هەزار فەرمانبەر لە سنووری شارەوانی هەولێر ئەنجامدا. 

لێدوانی فەرمی: دوای پرۆسەکە چەند کارمەندێکی ئاسایش بە ئاڤایان گوت، چاوەڕێ بووین لەو ژمارەیە هەر هیچ نەبێ ژمارەیەک کارمەندی ئاسایشیش زەوییان بەسەردا دابەش بکرابووایە، ئێمە بێبەش کراوین.

بۆچوونی لایەنی بەرامبەر: کارزان عەبدولهادی، سەرۆکی شارەوانی هەولێر بە ئاڤای وت، "57 هەزار فەرمانبەر ناویان گەڕاوەتەوە شارەوانی و ئەم پرۆسەیە کاتێکی زۆری دەوێت، ناچارین قۆناغ بە قۆناغ زەوی دابەش بکەین. لە قۆناغی یەکەم سێ هەزار پارچە زەوییمان دابەش کرد، قۆناغی دووەم بوو بە 14 هەزار".

زانیاریی زیاتر: کارزان عەبدولهادی وتیشی، پرۆسەکە بەردەوامە و ئەمجارە لە لیستەکە ژمارەیەک کارمەندی ئاسایشی تێدابوو. لەم هەفتەیە نا بەڵکو لە ئایندەیەکی نزیک قۆناغی سێیەمی ڕاکێشانی تیروپشک بەڕێوەدەچێت و کارمەندانی پۆلیس و ئاسایش زەوییان بەسەردا دابەش دەکرێت.