تەرازووی پێداچوونەوەی مانگەکانی پێنج و شەش ڕادەستی عێراق دەکرێت

ئاڤا نیوز

ڕێکارەکانی ناردنی مووچەی مانگی پێنج دەست پێدەکەن، لەو چوارچێوەیەدا تەرازووی پێداچوونەوەی (میزان موراجەعە) مانگەکانی پێنج و شەش ئەمڕۆ دەگاتە وەزارەتی دارایی عێراق و بڕیارە لە ماوەی ڕۆژانی داهاتوو مووچەی مانگی پێنج خەرج بکرێت.

وێنە گەورەکە: ڕێککەوتنی نوێی نێوان هەولێر و بەغدا کەوتە بواری جێبەجێکردن، بەگوێرەی ڕێککەوتنی نێوانیان، هەرێمی کوردستان لە داهاتی ناوخۆ بۆ هەر مانگێک 120 ملیار دینار دەداتە بەغدا و لەبەرامبەردا مووچەی مووچەخۆرانی کوردستان ڕەوانە دەکرێت.

 

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "ئەمڕۆ شەممە میزان موراجەعەی مانگەکانی پێنج و شەش بۆ وەزارەتی دارایی عێراق نێردراوە و ئەمڕۆ لەگەڵ کردنەوەی دەوامی بەفەرمی ڕادەست وەزارەتەکە دەکرێت."

 

ئەوەی پێشبینی دەکرێت: خشتەی دابەشکردنی مووچەی مانگی پێنج ئامادەیە، وەزارەتی دارایی هەرێمی کوردستان لەگەڵ گەیشتنی بڕیاری خەرجکردنی پارەکە، دەست بە دابەشکردنی مووچەی مانگی پێنج دەکات.

 

باکگراوند: دوای پەسەندکردنی لەلایەن ئەنجوومەنی وەزیرانی کوردستان و واژۆکردنی لەلایەن سەرۆکوەزیران مەسرور بارزانی، ئەنجوومەنی وەزیرانی عێراق لە کۆبوونەوەیەکی نائاساییدا ڕێککەوتنەکەی پەسەند کرد و سوودانیش واژۆی کرد،  دواتریش بڕیاری ناردنی یەک مووچەی دا.