ساسان عەونی: پڕۆژەی فریاگوزاریی خێرای ئاوی هەولێر دەبێتە هۆی داخستنی هەزار بیری ئاو

ئاڤا نیوز


ساسان عەونی، وەزیری شارەوانی و گەشتوگوزار ڕایگەیاند: فریاگوزاریی خێرایی ئاوی هەولێر یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان و گرفتی کەمئاوی چارەسەر دەکات. 


چیرۆکی سەرەکی: ڕۆژی یەکشەممە 20-07-2025، بە ئامادەبوونی سەرۆکوەزیران مەسرور بارزانی قۆناغی یەکەمی پڕۆژەی فریاگوزاریی خێرایی ئاوی هەولێر کرایەوە، هاوکات لەگەڵ کردنەوەی پڕۆژەکەش بەشێک لە گەڕەکەکانی شاری هەولێر ئاویان پێدەگات و سوودمەند دەبن لە ئاوی پڕۆژەکە. 


لێدوانی فەرمی: ساسان عەونی، وەزیری شارەوانی و گەشتوگوزار لە مەراسیمی کردنەوەی قۆناغی یەکەمی پڕۆژەی فریاگوزاریی خێرایی ئاوی هەولێر ڕایگەیاند: فریاگوزاریی خێرایی ئاوی هەولێر یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان کە بۆ ماوەی چەندین ساڵی داهاتوو گرفتی کەمئاوی لە هەولێر چارەسەر دەکات. 


- ئەو پڕۆژەی لە هەولێر جێبەجێکراوە لە ڕووی کوالێتییەوە لەسەر ئاستی هەموو عێراق لە پلەی یەکەم دایە، هاوکات دەبێتە هۆی داخستی نزیکەی هەزار بیری ئاوی خواردنەوە و کاریگەریی دەبێت لەسەر بوژاندنەوەی سامانی ئاوی ژێر زەوی. 

- لەماوەی 10 ڕۆژی داهاتوودا, نزیکەی 300 بیری ئاو بە تەواوی دادەخرێن و ژمارەکەش بەرز دەبێتەوە. 

لەلایەکی دیکەوە: سەرۆکوەزیران مەسرور بارزانی لەمیانی کردنەوەی پرۆژەی فریاگوزاریی خێرایی ئاوی هەولێر ڕایگەیاند، "پلانمان هەیە بۆ ڕیسایکل کردنەوەی ئاوی قورس و بەکارهێنانەوەی بۆ ئاودانی باخچەکان و سەوزایی بەکاربهێنرێت، پڕۆژەکەش بەزوویی دەخرێتە بواری جێبەجێ کردنەوە.