مەسرور بارزانی: پلانمان هەیە بۆ ڕیسایکلکردنی ئاوی قورس

ئاڤا نیوز

 

سەرۆکوەزیران مەسرور بارزانی دەڵێت، پلانمان هەیە بۆ ڕیسایکل کردنەوەی ئاوی قورس و بەکارهێنانەوەی بۆ ئاودانی سەوزایی و باخچەکان.

 

وێنە گەورەکە: له‌ سۆنگه‌ی گرنگیدانی حكومه‌تی هه‌رێمی كوردستان به‌ ژینگه‌ و ته‌ندروستی هاووڵاتیان، چه‌ندین پڕۆژە‌ی جیا جیا له‌ شار و شارۆچكه‌كانی هه‌رێمی كوردستان ئه‌نجام داوه‌ كه‌ ئامانج لێیان ته‌نها سوود گه‌یاندن بووه‌ به‌ هاووڵاتییان و ته‌ندروستی و خاوێنڕاگرتنى ژینگه‌ی ناوچه‌كه‌، یه‌كێك له‌و پڕۆژانه‌ی كه‌ لە کابینەى نۆیەم جێبەجێى کراوە، وێستگه‌ی چاره‌سه‌ركردنی ئاوی قورس بوو و ئێستا هەوڵدەدرێت ئەو پڕۆژەیە لە تەواوی ناوچەکان جێبەجێ بکرێت. 

لێدوانی فەرمی: سەرۆکوەزیران مەسرور بارزانی لەمیانی کردنەوەی پرۆژەی فریاگوزاری خێرای ئاوی هەولێر دەڵێت، "پلانمان هەیە بۆ ڕیسایکل کردنەوەی ئاوی قورس و بەکارهێنانەوەی بۆ ئاودانی باخچەکان و سەوزایی بەکاربهێنرێت، پڕۆژەکەش بەزوویی دەخرێتە بواری جێبەجێ کردنەوە.

 

ئەوەی پێویستە بیزانیت: سەرۆکوەزیران مەسرور بارزانی پاش کردنەوە پرۆژەی فریاگوزاریی خێرای ئاوی هەولێر داوایەکی لە هاونیشتمانییان کرد بەوەی، " زیادەڕەویی لە بەکارهێنانی ئاو نەکەن".

 

لەلایەکی دیکە: ئومێد خۆشناو، پارێزگاری هەولێر ڕایگەیاند، لە پێنج ساڵی ڕابردوو 100 ملیار دینار بۆ بیری نوێ و زیادکردنی قوڵیی بیرەکان خەرج کراوە، 130ملیار دیناریش ڕێڕەوی سروشتی ئاوی باران و ئاوەڕۆکان خەرج کراوە.

زانیاریی زیاتر: لە پارێزگای هەولێر چوار بەنداو و ژمارەیەک پۆندی تەواو کراون، ژمارەیەک پۆندی دیکەش لە جێبەجێ کردندان.


ئەمەش بزانە: پێشتر بۆ یەکەمجار له‌ ساڵی 2019دا، له‌ چوارچێوه‌ی كاره‌كانی كابینه‌ی نۆیه‌می حكومه‌تی هه‌رێمی كوردستان، ده‌ست به‌ جێبەجێکردنى وێستگه‌ی چاره‌سه‌ركردنی ئاوی قورس لە ناحیه‌ی فایده کرا و پڕۆژەکە ‌له‌ مانگی 7ی 2020 بەشێوه‌یه‌كی فه‌رمی كه‌وته‌ كار.