بەغدا بەردەوامە لە بیانوو هێنانەوە بۆ خەرجکردنی مووچە

ئاڤا نیوز

بەغدا بەردەوامە لە بیانوو هێنانەوە بۆ خەرجکردنی مووچە، جارێکی دیکە ئاستەنگی لەبەردەم دوایین ڕێککەوتن دروست کردووە و بڕگەیەکی زیاد کردووە بۆ ئەو ڕێککەوتنەی کە پارتی و یەکێتی پێکەوە هاوڕابوون لەسەری دەڵێت، هەتا دەست نەکرێت بە هەناردەکردنی ئەو بڕە نەوتەی لەسەری رێککەوتبووین، مووچە نانێرین.

وێنە گەورەکە: سەرەڕای جێبەجێکردنی سەرجەم داواکارییەکان لەلایەن حکومەتی کوردستان، حکومەتی عێراق بەردەوامە لە بیانوو هێنانەوە و زیادکردنی مەرج و بڕگەی زیاتر، ماوەی نزیکەی سێ مانگە مووچەی کوردستانی ڕاگرتووە و خەرجی ناکات.

بەغدا چی دەوێت: لەلایەکەوە ئێستا بە ڕێککەوتنەکە پابەند نابێت، دەڵێت دەبێ نەوت هەناردە بکرێتەوە، لەلایەکیشەوە هێرشی درۆنی هەیە بۆ سەر کێڵگەکانی نەوت، لەم کاتە چۆن هەناردەی نەوت دەستپێبکاتەوە.

لێدوانی فەرمی: ئەمڕۆ تەیف سامی لەگەڵ لیژنەی دارایی پەرلەمانی عێراق کۆبووەتەوە و گوتوویەتی: دەبێت حکومەتی هەرێمی کوردستان دەست بە هەناردەکردنەوەی نەوت بکاتەوە و داهاتی نانەوتی ڕادەستی بەغدا بکات، ئەو کات مووچەی مانگی پێنج دەنێرین. ئەمە بە قسەی پەرلەمانتارانی کورد کە لە کۆبوونەوەکە بەشدار بوون.

هەنگاوی داهاتوو: بڕیارە هەردوو تیمی تەکنیکی هەولێر و بەغداش ئەم سێشەممەیە یەکەم کۆبوونەوە بکەن، کۆبوونەوەکە بۆ هەنگاوەکان و شێوازی جێبەجێکردنی ڕێککەوتنەکەیە لەبارەی نەوت و مووچە و داهاتی ناوخۆ.

لەلایەکی دیکەوە: ئەمڕۆ دەست بە ئامادەکردنی لیستی مووچەی مانگی حەوت کرا و سیستەمی پەیرۆڵ کارا کرا، وەزارەتی دارایی کوردستان گەنجینەکانی ئاگادارکردووەتەوە لیستی مووچەخۆرەکانیان بنێرن، ڕەچاوی لێبڕینی سەدا سێیی مووچەش بکەن بۆ دانەوەی قەرزی خانەنشینی.