پڕۆژەی ستراتیژیی گواستنەوەی ئاوی دووکان - سلێمانی جێبەجێدەکرێت

ئاڤا نیوز

بەمنزیكانە پرۆژەیەكی گەورەی ئاو هاوشێوەی پرۆژەی فریاگوزاریی خێرای ئاوی هەولێر لە سلێمانی جێبەجێدەكرێت و كێشەی ئاوی شارەكە و دەوروبەری بۆ هەمیشە ناهێڵێت.

چیرۆکی سەرەکی: پرۆژەی ستراتیژیی گواستنەوەی ئاوی دووكان - سلێمانی، كە لەسەر ڕاسپاردەی سەرۆكوەزیران مەسرور بارزانی جێبەجێدەكرێت و ڕەزامەندی هەردوو وەزارەتی دارایی و وەزارەتی پلاندانانی لەسەر تەواوبووە و ئێستا لە قۆناغی تەندەرینگە و لە ماوەیەكی نزیكدا ڕادەگەیێنرێت، پێشبینی دەكرێت لە ماوەیەکی نزیک، بەردی بناغەی پرۆژەكە دابنرێت.

پرۆژەكە گواستنەوەی ئاوی دووكانە بەرەو سلێمانی، بۆ جێبەجێكردنی بەشی یەكەمی پرۆژەكەش، گوژمەی 293 ملیۆن دۆلار تەرخانكراوە.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی كوردستان تایبەت بە ئاڤا ڕایگەیاند، پرۆژەكە لە كاتژمێرێكدا، 10 هەزار مەترسێجا ئاوی خاوێن دەپاڵێوێت، واتە ڕۆژانە 240 هەزار مەتر سێجا ئاو بۆ سلێمانی دابین دەكات، هاوكات هێڵەكانی گواستنەوە و تۆڕە ناوخۆییەكانیش لەخۆدەگرێت كە دوو هێڵی سەرەكیی گواستنەوەن بە تیرەی هەزار و چوارسەد ملیمەتر واتە (مەترێك و چل سانتیمەتر ئەستووری بۆڕییەكانە) و بە دووری 61 كیلۆمەتر، ئاو بە سێ وێستگەی سەنتەری سلێمانی دەگەیەنێت.

زانیاریی زیاتر: پرۆژەكە لە چەند بەشێكی سەرەكی پێكهاتووە:

یەك، دابینكردنی كارەبا

دوو، بەشی ئینتەیك

سێ، وێستگەی پاڵاوتنی سەرەكی كە ئاوی دووكان بەرەو سلێمانی دەبات

بەهۆیەوە ملیۆنێك كەس لێی سوودمەند دەبن و كێشەی ئاوی سلێمانیش بەیەكجاری چارەسەر دەكات كە ئێستا ناوە ناوە سەرهەڵدەداتەوە.