دەیان جووتیاری سنووری مەخموور بەهۆی سیستمەوە گەنمەکانیان کۆگا نەکرا

ئاڤا نیوز

زیاتر لە هەزار تۆن گەنمی جووتیارانی گوێڕ و دیبەگە لە سایلۆی هەولێر کۆگا نەکرا، بەهۆی ئەو سیستمەی لەلایەن وەزارەتی بازرگانی عێراقەوە دانراوە، گەنمەکانیان لە سایلۆی مەخمووریش وەرناگیرێت.

چیرۆکی سەرەکی: بڕیاربوو 27 هەزار تۆن گەنمی جووتیارانی گوێڕ و دیبەگە لەسایلۆی مەخموور کۆگا بکرێت، پێنج ڕۆژ وادەکەش بۆ ئەو مەبەستە درێژکرایەوە، بەڵام بەشێکی گەنمەکە وەرنەگیرا و دەیان جووتیار زەرەرمەند دەبن.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "ئەو جووتیارانەی گەنمەکانیان وەرنەگیراوە، ناویان لەسیستمی نۆرە تۆمارنەکرابوو، سەرەڕای هەوڵەکانمان قبووڵنەکرا و زیاتر لە هەزار تۆن گەنمی جووتیارانی دیبەگە و گوێڕ وەرنەگیرا."

زانیاریی زیاتر: بەگوتەی هێمن سەید موراد، بەڕێوەبەرایەتی گشتیی کشتوکاڵی هەولێر، سەرقاڵی کۆگاکردنی ئەو گەنمەیە کە هی جووتیارانی سنووری هەولێرە و لەدەرەوەی پلانی كشتوکاڵی دانراوە، بۆ ئەوەی لەڕێگەی کەرتی تایبەتەوە بەبازاڕبکرێت، ئەگەر جووتیارانی دیبەگە و گوێر داواکاریی پێشکەش بکەن ئەو گەنمەی ئەوانیش دەخرێتە ئەو چوارچێوەیە.