کونسوڵی گشتیی قەتەر ستایشی پڕۆژەی ئاو و کارەبای 24 کاتژمێری لە کوردستان دەکات

ئاڤا نیوز

سەرۆکوەزیران مەسرور بارزانی لەگەڵ حوسێن بن عەلی ئەلفەزالە، كونسوڵی گشتیی قەتەر لە هەرێمی كوردستان بە بۆنەی کۆتاییهاتنی ئەرکە دیپلۆماتییەکەی کۆبوونەوە، ئەلفەزالە ستایشی پرۆژەی ئاو و کارەبای 24 کاتژمێری لە کوردستان کرد.

ڕاگەیێنراوی فەرمی: ماڵپەڕی حکومەتی هەرێمی کوردستان ڕایگەیاند: سەرۆکوەزیران مەسرور بارزانی لە دیدارەکەدا ئاماژەی بە گرنگیی پتەوکردنی زیاتری پەیوەندیی دوولایەنە کرد، سوپاسی کونسوڵی گشتیی قەتەری کرد بۆ ئەو ماوەی کاری بۆ بەهێزتربوونی پەیوەندییەکانی نێوان هەرێمی کوردستان و قەتەر کردووە، هیوای سەرکەوتنی لە ئەرکی داهاتوویدا بۆ خواست.

لەلایەکی دیکەوە: کونسوڵی گشتیی قەتەر ستایشی پرۆژە خزمەتگوزارییەکانی حکومەتی هەرێمی کوردستانی لە کەرتە جۆراوجۆرەکاندا کرد، بە تایبەتی پڕۆژەی ئاو و کارەبای 24 کاتژمێری، سوپاسی خۆی بۆ هاوكاری و پشتگیریی لایەنە پەیوەندیدارەكانی حکومەت دەربڕی، خواستی وڵاتەکەی بۆ برەودانی زیاتر بە پەیوەندییەكانی لەگەڵ هەرێمی کوردستان دووپات كردەوە.