پڕۆسەی وەرگرتنی گەنمی ماوەی جووتیاران دەستیپێکرد

ئاڤا نیوز

ئەو گەنمەی لە پرۆسەی بە بازاڕکردنی گەنم لە هەرێمی کوردستان وەرنەگیراوە، ئێستا لەلایەن دوو کۆمپانیای ناوخۆییەوە وەردەگیرێت.

وێنە گەورەکە: ساڵانە لەلایەن دەستەی وەبەرهێنان و وەزارەتی کشتوکاڵ بە ئاگاداری وەزارەتی بازرگانی لەگەڵ کۆمپانیا ناوخۆییەکان ڕێککەوتن دەکرێت، تا ئەو گەنمە وەربگرن کە جووتیاران لە پرۆسەی بەبازاڕکردن لێیان وەرنەگیراوە.

لێدوانی فەرمی: محەممەد شوکری، سەرۆکی دەستەی وەبەرهێنان و سەرۆکی لیژنەی وەرگرتنی گەنم، بە ئاڤا میدیای ڕاگەیاند: ڕێککەوتنێک بۆ وەرگرتنی گەنمی جووتیاران لەگەڵ کۆمپانیاکانی قەیوان و خۆشناو کراوە، ئێستا بەگوێرەی ئەو پێوەرانەی دیاریکراوە دەست بە وەرگرتنی گەنمەکە کراوە.

سەرۆکی دەستەی وەبەرهێنان دەڵێت، ئەمە پرۆژەی وەبەرهێنانە و بە هاوبەشی لەگەڵ وەزارەتی کشتوکاڵ و بە ئاگاداری وەزارەتی بازرگانی کارەکان دەکرێن، هەروەها لیژنەیەک بۆ وەرگرتنی گەنمەکە دیاریکراوە و خۆم سەرۆکی ئەو لیژنەیەم.

زانیاریی زیاتر: بۆ هەر تۆنێک گەنمی پلەیەک 550 هەزار دینار، گەنمی پلە دوو 525 هەزار دینار دیاریکراوە.

ئەوەی پێویستە بیزانیت: ئەو گەنمەی لەلایەن کۆمپانیاکانەوە وەردەگیرێت، بۆ ئارد، ساوەر، گەنمەکوتا، بڕوێش، عەڵەف لە ناخۆدا بەکاردەهێنرێت.