سیاسەتمەدارێک ناوی بەرپرسانی هێرشە درۆنییەکانی سەر هەرێمی کوردستان ئاشکرا دەکات

ئاڤا نیوز

سیاسەتمەدارێکی عێراقی، ناو و ناونیشانی بەرپرسانی هێرشە درۆنییەکان بۆ سەر سەرکێڵگە نەوتییەکانی هەرێمی کوردستان ئاشکرادەکات و دەڵێت ئەمریکا سەبارت بەم پرسە هەڵوێستی دەبێت.

چیرۆکی سەرەکی: لە سەرەتای مانگی تەممووزی ئەمساڵ 10 هێرشی درۆنی کراوەتە سەر هەرێمی کوردستان و لەلایەن هێزە ئەمنییەکانەوە توانراوە بەشێکی ئەو درۆنانە بخرێنە خوارەوە. بەشێک لەو هێرشانە ژێرخانی ئابووری بەتایبەتی کێڵگە نەوتییەکانی هەرێمی کوردستانی کردووەتە ئامانج.

لێدوانی فەرمی: ئینتیفاز قەنبەر،  سیاسەتمەداری عێراقیی نیشتەجێی ئەمریکا، لەگرتە ڤیدیۆیەکدا لەتۆڕی کۆمەڵایەتی فەیسبووک بە پشتبەستن بە زانیاریی هەواڵگریی ئەمریکی دەڵێت، "هەموو ئەو هێرشە درۆنییانەی دەکرێنە سەر شاری هەولێر و دهۆک لە دەشتی نەینەواوە ئاراستە دەکرێن، هاوکات ئەو هێرشانەشی دەکرێنە سەر شاری سلێمانی و کێڵگە نەوتیەکانی گەرمیان لەدەورووبەری کەرکووکەوە ئاراستە دەکرێن.

ئەو سیاسەتمەدارە عێراقییە ئاشکرای دەکات کە سەڵاح مەگسوسی، بەرپرسی هێزی ئاسمانی حەشدی شەعبی کە لەساڵی 2019ەوە ئەو پۆستەی بەفەرمی وەرگرتووە و حەیدەر غەرراویی کە بەرپرسی گرووپی ئەنساروللای ئەوفیایە، بە کەسی یەکەم و دووەمی ئەو هێرشانە تۆمەتباریان دەکات.

قەنبەر، ئەوەشی ئاشکرا کرد، بەرپرسانی ئەمریکا لە هەموو کاتێک زیاتر گەیشتوونەتە ئەو بڕوایەی کە پێویستە سنوورێک بۆ ئەم کارە تیرۆرستییانە دابنرێت و کۆتایی پێبێت.