توێژینەوەیەک: هێلکە کۆڵیسترۆڵی زیانبەخشی نییە

ئاڤا نیوز 

توێژینەوەیەکی زانستی تیشکی خستۆتە سەر ئەو بیروڕا باوەی کە گوایە خواردنی هێلکە ئەگەری تووشبوون بە نەخۆشییەکانی دڵ زیاد دەکات، بەهۆی بەرزکردنەوەی ئاستی کۆڵیسترۆڵی خوێن، توێژینەوەکە پێچەوانەی ئەم ڕایە دووپاتدەکاتەوە.

زانیاریی بەدەستهاتوو: ئەنجامی لێکۆڵینەوەیەک کە لە گۆڤاری "ئەمریکن جۆرناڵ ئۆف کلینیکال نۆتریشن" بڵاوکراوەتەوە، ئەو کەسانەی بەشدارییان لە تاقیکردنەوەی پزیشکیدا کردووە و ڕۆژانە دوو هێلکەیان خواردووە، ئاستی کۆڵیسترۆڵی زیانبەخشی 'ئێڵ دی ئێڵ'ـیان کەمبووەتەوە، بەمەرجێک کە  خواردنەکانی دیکەیان ڕێژەی چەوریان کەمتر بێت.

ئەوەی لەبارەیەوە دەگوترێت: جۆن باکلی نووسەری سەرەکی توێژینەوەکە دەڵێت، کاتێک باس لە نانی بەیانی دەکرێت هێلکە پێکهاتەیەکی سەرەکییە، گۆشتی قاشکراو یان سۆسیج ئەوانە زیاتر کاریگەریی نەرێنی لەسەر تەندروستی دڵ دروست دەکەن، هێلکە خۆراکێکی ناوازەیە، بەو پێیەی ڕێژەی کۆڵیسترۆڵی زۆرە بەڵام چەوری زیان بەخشی نییە.

زانیاریی زیاتر: توێژینەوەکە سێ شێوازی ڕجیمی جیاوازی خستووەتەڕوو، ئەنجامەکان دەریانخستووە کە ئاستی کۆڵیسترۆڵی زیانبەخش کەمبووەتەوە لەکاتی پەیڕەوکردنی ئەو ڕێجیمەی کە ڕۆژانە دوو هێلکە لەخۆدەگرێت، بەراورد بە دوو ڕێجیمەکەی تر.