نەشتەرگەرییەکی دەگمەن؛ 16 موکێش و هەشت دەرزی لە سکی نەخۆشێک دەرهێنران

ئاڤا نیوز

نەشتەرگەرییەکی دەگمەن بە سەرکەوتوویی لەلایەن تیمێکی پزیشکییەوە لە نەخۆشخانەیەکی سلێمانی بۆ گەنجێک ئەنجامدرا و ژمارەیەکی زۆر موکێش و دەرزی لە گەدەیدا دەرهێنران.

چیرۆکی سەرەکی: گەنجێکی تەمەن 29 ساڵ کە نەخۆشیی دەروونیی هەبووە، 16 موگناتیس و هەشت دەرزی و دوو بەرگی موکێشی خواردبوو. دوای گەیاندنی گەنجەکە بۆ نەخۆشخانەی شار لە سلێمانی، تیمێکی پزیشکیی 16 کەسی دەستیان بە نەشتەرگەریی کرد و توانییان نەخۆشەکە لە مردن ڕزگار بکەن و دەرزی و موکێشەکان لە سکی دەربهێنن.

لێدوانی فەرمی: د. هیوا ئەبوبەکر حوسێن، پسپۆڕی هەرس و جگەر، بە ئاڤا میدیای ڕاگەیاند، "ئەم حاڵەتە یەکێکە لە دەگمەنترین حاڵەتەکان کە لە ژیانی پزیشکیمدا بینیبێتم. نەخۆشێک کە کێشەی دەروونیی هەبوو، بەهۆی ئەو بارە دەروونییەی تێیکەوتبوو، هەر شتێک هاتبێتە بەردەستی خواردبووی. ژمارەیەکی زۆر موکێش و دەرزیی خواردبوو. کاتێک باوکی کوڕەکەی گەیاندە نەخۆشخانە، بینیمان ژمارەیەکی زۆر دەرزی و موکێش لە گەدەیدایە، بۆیە لەگەڵ تیمێک لە پزیشکی پسپۆڕ و پزیشکی بێهۆشکەر، دەستمان بە نەشتەرگەریی کرد و توانیمان سەرجەم دەرزی و موکێشەکان دەربهێنین."

زانیاریی زیاتر: لەم نەشتەرگەرییەدا هەشت پزیشک و شەش کارمەندی تەندروستی لە هەموو بەشەکان بەشدار بوون و نەشتەرگەرییەکە دوو کاتژمێری خایاند، کە لەلایەن تیمێکی پزیشکیی بەشی هەناوبینی و بێهۆشکاریی نەخۆشخانەی فێرکاریی کۆئەندامی هەرس و جگەرەوە کرا.

ئەوەی پێویستە بزانرێت: لەسەر ئاستی هەرێمی کوردستان و عێراق، ئەمە یەکەم جارە کەسێک ئەو ژمارە زۆرە کەرەستەیە بخوات و لە گەدەیدا بمێنێتەوە و نەشتەرگەریی بۆ بکرێت.