سەرۆك بارزانی بۆ خەڵكی كوردستان: شانازیتان پێوە دەكەم

ئاڤا نیوز

 

سەرۆك بارزانی پەیامێك ئاراستەی تەواوی خەڵكی كوردستان دەکات و دەڵێت، "شانازیتان پێوە دەكەم و سوپاستان دەكەم".

 

وێنە گەورەكە: زیاتر لە 82 ڕۆژە بەهۆی نەناردنی پارە لەلایەن بەغداوە، مووچەی فەرمانبەرانی هەرێمی كوردستان دابەش نەكراوە، ئەمە لەكاتێكدایە لە هەفتەی ڕابردووەوە ڕەشنووسی ڕێككەوتنی نێوان هەولێر و بەغدا لەلایەن هەردوو حكومەتی هەرێمی كوردستان و عێراقەوە واژۆ كراوە، ئێستا فەرمانبەرانی هەرێمی كوردستان چاوەڕوانن وەزارەتی دارایی عێراق مووچەی مانگی پێنجیان بۆ بنێرێت.

 

پەیامی فەرمی: ئێوارەی ئەمڕۆ سێشەممە 22-7-2025، سەرۆك بارزانی پەیامێكی بۆ خەڵكی كوردستان بڵاوكردەوە و ڕایگەیاند: سوپاس بۆ گەلی کوردستان، سەرەڕای هەموو فشارەکان وەک هەمیشە خۆڕاگر بوون، ئێوە نموونەی وەفا و فیداکارین، شانازیتان پێوە دەکەم و جارێکیتر سوپاستان دەکەم.

 

زانیاریی تایبەت: بەپێی زانیارییەكانی ئاڤا میدیا ئەمڕۆ ئەنجوومەنی وەزیرانی عێراق كۆبووەوە و لەمیانەدا محەممەد شیاع سوودانی، جەختی كردووەتەوە كە دەبێت بە زووترین كات مووچەی فەرمانبەرانی هەرێمی كوردستان بنێردرێت و كەمبوونەوەی بەرهەمهێنانی نەوتی هەرێمی كوردستانیش نەبێتە ڕێگر.