پەیامێک لە هەسەدەوە: مەحاڵە لەم کاتەدا چەکەکانمان ڕادەست بکەین

ئاڤا نیوز

 

وتەبێژی فەرمیی هێزەکانی سووریای دیموکرات (هەسەدە)، ڕادەستکردنی چەک بە حکومەتی سووریا لەم کاتەدا  بە "کارێکی مەحاڵ و ئەستەم" ناودەبات.

 

وێنە گەورەکە: دوای واژۆکردنی ڕێكکەوتنێکی هەشت خاڵی لە مانگی ئاداری ڕابردوو لەنێوان مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا، هەوڵەکانی ئەمریکا بەردەوامن بۆ تێکەڵکردنی هێزەکانی هەسەدە لەگەڵ سوپای سووریا. لە بارەیەوە تورکیا و ئەمریکا مۆڵەتێکی 30 ڕۆژەیان داوەتە هێزەکانی سووریای دیموکرات (هەسەدە) کە دەبێت لە ماوەی چەند هەفتەیەکدا بچنە پاڵ حکومەتی دیمەشق.

 

لێدوانی فەرمی: ئەبجەر داوود، گوتەبێژی فەرمیی هێزەکانی سووریای دیموکرات (هەسەدە) ڕایگەیاند: لە سۆنگەی گرژییە بەردەوامەکانی سووریا و بەرزبوونەوەی ئاستی توندوتیژی و هەڕەشەکانی ڕێکخراوی داعش، مەحاڵە هێزەکانی سووریای دیموکرات چەکەکانیان ڕادەست بکەن.

 
ئەوەی پێویستە بیزانیت: گوتەبێژەکەی هەسەدە مەرج بۆ چوونە پاڵ سوپای سووریا دادەنێت کە ئەگەر لە ڕێگەی "ڕێککەوتنێکی دەستووریی توکمەوە، دان بە تایبەتمەندیی کورد بنرێت، هەسەدە دەچێتە پاڵ سوپای سووریا".

جەختیش دەکاتەوە، "هەسەدە بەهیچ شێوەیەک لەگەڵ جەنگدا نییە، بەڵام بەرگری لە گەلەکەی دەکات لە هەر شوێنێک بوونی هەبێت".

 

باکگراوند: پێشتر بەڕێوەبەرایەتیی خۆسەر ڕایگەیاندبوو، لە چوارچێوەی گەڕان بەدوای چارەسەرێکی سیاسیی گشتگیر بۆ قەیرانی سووریا. ئەو کۆبوونەوانەی ئەم دواییە لەگەڵ حکومەتی سووریا لە دیمەشق ئەنجامیان داوە، هەنگاوێکی ئێجگار گرنگن لەسەر ڕێگای دەستپێکردنی دیالۆگ لەنێوان هەردوولا .