"کۆچکردن دەستیپێکردووە".. "45%ی" زەوی کشتووکاڵی لە پارێزگایەکی عێراق دەبێتە بیابان

ئاڤا نیوز

 

گۆڕانکارییەکانی کەشوهەوا و بەبیابانبوون خەریکە پارێزگای موسەننا لە باشووری عێراق ڕووبەڕووی کۆچی بە کۆمەڵی دانیشتووانەکەی دەکاتەوە، بەجۆرێک بەوتەی جوتیاران پارێزگاکە 45%ی زەوییە کشتووکاڵییەکانی و 60%ی بەرهەمی کشتووکاڵی لەدەست داوە.

 

چیرۆکی سەرەکی: گۆڕانکارییەکانی ژینگە کە خۆی لە زیادبوونی ڕووبەری بەبیابان بوون و کەمبوونەوەی سەرچاوەکانی ئاودا دەبینێتەوە، هەڕەشەی لەسەر لەناوبردنی هەمەجۆری میوە و ئاژەڵان دروستکردووە و خەڵکی موسەنناشی ناچارکردووە بۆ گەڕان بەدوای سەرچاوەی دیکەی بژێویدا، ڕوو لە پارێزگاکانی دیکەی باشووری عێراق بکەن.

 

لێدوانی فەرمی: حوسێن علێوی، جوتیارێکی ناوچەی ئەلسوەیری موسەننایە و دەڵێت، 10 ساڵ لەمەوبەر تەنیا بە چاندنی گەنم و جۆ داهاتی خێزانەکەی دابین دەکرد، بەڵام ئێستا ئاو و زەوی کشتوکاڵی نەماوە، تەنیا لە پێنج ساڵیشدا 45%ی" زەوییە کشتووکاڵیەکان چوونەتەدەرەوەی خزمەت.

 

شارەزایانی بواری ژینگە دەڵێن، ساڵانە 2500 دۆنم زەوی کشتوکاڵی لە پارێزگای موسەننا بەبیان دەبێت و 60%ی بەرهەمی کشتوکاڵیش کەم دەبێتەوە.

 

گۆشەیەکی دیکەی دیمەنەکە: هەرچەندە حکومەتی خۆجێی موسەننا لەڕێگەی زیادکردنی ڕووبەری سەوزایی و چاندنی نەمامەوە هەوڵی ڕووبەڕووبوونەوەی گۆڕانکارییەکانی کەشوهەوای داوە، بەڵام ژینگەی پارێزگاکە دەڵێت، جگە لەوەی بودجەی ڕووبەڕووبوونەوەی گۆڕانکارییەکانی کەشوهەوا کەمە، لە پڕۆژەکانیشدا هەماهەنگی کارگێڕیی خراپە، ئەوەش وایکردووە جێبەجێکردنی پڕۆژەکان پەکیان بکەوێت.