ئەمریکا بۆ ئەحمەد شەرع: پێداچوونەوە بە سیاسەتەکانت بکە

ئاڤا نیوز

نێردەی ئەمریکا بۆ سووریا، داوای لە ئەحمەد شەرع، سەرۆککۆماری سووریا کرد "بەخێرایی خۆی بگونجێنێت" و پێداچوونەوە بە سیاسەتەکانیدا بکات لەبەر ڕۆشنایی ڕووداوەکانی سوەیدا. هاوکات ئاماژەی بەوەشکرد کە ئەو تووندوتیژییەی پارێزگاکە بەخۆیەوە بینی کاری هێزە حکومییەکان نییە و جەختیشی کردەوە کە هیچ جێگرەوەیەک بۆ حکومەتی ئێستای وڵاتەکە نییە.

چیرۆکی سەرەکی: بەهۆی گرژی و ئاڵۆزییەکانی ئەم دواییەی نێوان چەکدارانی دروز و هێزە ئەمنییەکانی سووریا لە سوەیدا، ئیسرائیل بۆ پشتگیرکردن لە دروزەکان چەند هێرشێکی ئاسمانی کردە سەر ناوچەکانی سووریا و ئەمەش نیگەرانی ئەمریکای بەدوای خۆیدا هێنا.

لێدوانی فەرمی: تۆم باراک، نێردەی ئەمریکا بۆ سووریا، لە چاوپێکەوتنێکدا لەگەڵ ئاژانسی ڕۆیتەرز لە بەیروت ڕایگەیاند، ئەگەر شەرع گۆڕانکاریی خێرا ئەنجام نەدات، ئەوا "ڕەنگە ئەو هێز و پاڵنەرەی لەدەست بدات کە پاڵی پێوەنا بەرەو دەسەڵات". وتیشی، لە میانی گفتوگۆ تایبەتەکانیدا ئامۆژگاریی سەرۆکی سووریای کردووە بە کەمکردنەوەی ئاراستە ئیسلامییەکان و داواکردنی یارمەتیی ئەمنیی هەرێمی.

نێردە ئەمریکییەکە پێی وابوو کە پێویستە حکومەتی سووریا بیر لە "خێراکردنی پەیڕەوکردنی گشتگیری" بکاتەوە سەبارەت بە تێکەڵکردنی کەمینەکان لە پەیکەرەکانی دەسەڵاتدا.

وتیشی: "ئێمە شێوازی سیستمی سیاسیی سووریا دیاری ناکەین، جگە لە جەختکردنەوە لەسەر پێویستیی سەقامگیری، یەکڕیزی، دادپەروەری و گشتگیری."

باراک بەرپرسیارێتیی حکومەتی سووریای لە توندوتیژییەکانی سوەیدا ڕەتکردەوە و وتی: "هێزە سورییەکان نەچوونەتە ناو شارەکە. ئەم تاوانە قێزەونانە لەلایەن هێزەکانی حکومەتی سووریاوە ئەنجام نادرێن. ئەوان تەنانەت لە شارەکەدا نین، چونکە لەگەڵ ئیسرائیل ڕێککەوتوون کە نەچنە ناویەوە."

نێردە ئەمریکییەکە وتیشی، مەترسییەکان لە سووریا زۆر گەورەن لە ئەگەری نەبوونی پلانێک بۆ گواستنەوەی دەسەڵات یان جێگرەوەیەکی واقیعی بۆ حکومەتی ئێستا.