پزیشکیان: کۆتاییهێنان بە بەرنامە ئەتۆمییەکەمان خەیاڵە

ئاڤا نیوز

سەرۆککۆماری ئێران لەبارەی پرسی بەرنامە ئەتۆمییەکەی وڵاتەکەیەوە دەڵێت: "قسەکردن لەسەر کۆتاییهێنان بە بەرنامە ئەتۆمییەکەی ئێران خەیاڵە".

لێدوانی فەرمی: مەسعود پزیشکیان، سەرۆککۆماری ئێران، لە چاوپێکەوتنێکی تایبەتدا لەگەڵ کەناڵی جەزیرەی عەرەبی ڕایگەیاند: "قسەکردن لەسەر کۆتاییهێنان بە بەرنامە ئەتۆمییەکەی ئێران تەنها خەیاڵێکە". ناوبراو جەختی لەوەش کردەوە کە توانا ئەتۆمییەکانی ئێران لە مێشکی زاناکانیدایە، نەک تەنها لە دامەزراوەکانیدا.

زانیاریی زیاتر: پزیشکیان ئامادەیی وڵاتەکەی بۆ هەر چالاکییەکی سەربازیی ئیسرائیل دووپاتکردەوە و ئاماژەی بەوەشکرد، ئیسرائیل لە هەوڵەکانیدا بۆ پارچەپارچەکردنی ئێران و لەناوبردنی ڕژێمەکەی لە ڕێگەی ئاژاوەگێڕییەوە شکستی هێناوە.

لەلایەکی دیکەوە: ئیسرائیل کاتز، وەزیری بەرگریی ئیسرائیل، ڕایگەیاند: "ئەگەری دەستپێکردنەوەی هەڵمەتە سەربازییەکانمان دژی ئێران هەیە و پێویستمان بە پاراستنی ئەو دەستکەوت و باڵادەستییە ئاسمانییەیە کە لە دوای ئۆپەراسیۆنەکانمان لە ئێران دروست بوون. لە هەمان کاتدا پلانێکی کاریگەر دادەڕێژین بۆ ئەوەی دڵنیابین لەوەی کە ئێران بەرنامە ئەتۆمی و مووشەکییەکانی ناگەڕێنێتەوە."