لە عێراق پڕۆژەی شیرینکردنی ئاوی دەریا جێبەجی دەکرێت

ئاڤا نیوز

بڕیارە سبەی پێنجشەممە سەرۆکوەزیرانی عێراق لە بەسرە بەردی بناغەی پڕۆژەی شیرینکردنی ئاوی دەریا دابنێت.

وێنە گەورەکە: بەهۆی وشکەساڵی و بەرزبوونەوەی پلەکانی گەرما، پارێزگاری بەسرە ڕووبەڕووی قەیرانی ژینگەیی و کەمی ئاوی خوواردنەوە بووەتەوە بەجۆرێک مەترسی لەسەر تەندروستیی زیاتر لە سێ ملیۆن کەس لە دانیشتووانی پارێزگاکە دروستکردووە. بۆ چارەسەرکردنی ئەو قەیرانە، عێراق هەوڵ دەدات سود لە ئاوی دەریا وەربگرێت.

ڕاگەیێنراوی فەرمی: بەپێی ڕاگەیێنراوێکی حکومەتی عێراق، بڕیارە سبەی پێنجشەممە محەممەد شیاع سوودانی، سەرۆکوەزیرانی عێراق سەردانی پارێزگای بەسرە بکات و بەردی بناغەی پڕۆژەی شیرینکردنی ئاوی دەریا دابنێت و چەند پڕۆژەیەکی نەوتیش بکاتەوە، کە بە یەکێک لە گرنگترین پڕۆژەکانی زیادکردنی هێزی بەرهەمهێنانی کەرتی نەوتی دادەنرێت و دەکەوێتە چوارچێوەی پلانی بەرەوپێشبردن و باشترکردنی توانای وەگەڕخستن.

- هەر لە سەردانەکەیدا بۆ پارێزگای بەسرە، سوودانی پردێکی هەڵواسراویش دەکاتەوە.

زانیاریی زیاتر: سەرۆکوەزیران لە سەردانەکەیدا دیداری لەگەڵ چەند شێخ و سەرۆک هۆزێکی شارەکە دەبێت، بۆ گوێگرتن لە داواکاریی خەڵکی ناوچەکە و چارەسەرکردنی کێشە و گرفتەکانیان.