تابلۆی ئۆتۆمبێلی میری گۆڕانکاری بەسەر دادێت

ئاڤا نیوز

لەمەودوا تابلۆی ئۆتۆمبێلی میری، ژمارە شین ڕێكدەخرێتەوە و تابلۆكەشی بەپێی ستاندارد و پێوانەی نوێ چاپ دەكرێت.

وێنە گەورەكە: وەزارەتی دادی حكومەتی هەرێمی كوردستان ژمارە 335 ی ڕۆژنامەی وەقایعی كوردستانی بڵاوكردەوە، یەكێك لە بڕگەكانی ڕۆژنامەكە، ڕێنمایی ژمارە 6 ـی ساڵی 2025 لەخۆدەگرێت كە تایبەتە بە دیاریكردنی شێواز و قەبارە و ڕەنگ و ناوەڕۆكی تابلۆی ئۆتۆمبێلی میری.

تایبەتمەندیی تابلۆی نوێی ئۆتۆمبێلی میری چییە:

٠ تابلۆی ئۆتۆمبێلی میری، لە شەش خانە پێكدێت، 'دوو پیت و چوار ژمارە' سەرەڕای چاپكردنی پیتی G واتە گۆڤەرمێنت 'حكومەت' كە لەگەڵ سەرجەم تابلۆكانی دیكەی جیا دەكاتەوە. هەموو ئەو پیت و ژمارانەش بە ڕەنگی ڕەش لەسەر تابلۆی شین چاپ دەكرێت.

٠ هەریەك لە دامەزراوە حكومییەكان زنجیرەی ژمارەی تابلۆی ئۆتۆمبێلی تایبەت بە خۆی دەبێت و لە ژمارە (1)ـەوە دەستپێدەكات.

٠ كۆدێكی دوو پیتی لاتینی لەخۆدەگرێت بۆ سەرۆكایەتییەكان و ئەنجوومەنی دادوەری و هەر وەزارەتێك یاخود فەرمانگەیەكی حكومی.

ئەوەی پێویستە بیزانیت: لەكاتی بەستانی تابلۆی ئۆتۆمبێلی میری، دەبێت ئەو فەرمانگە یاخود ئەو فەرمانبەرەی ئۆتۆمبێلەكەی لەلایە، پاكانەی سزا و پێبژاردنەكان بكات كە لەسەر ئۆتۆمبێلەكەیە بەهۆی سەرپێچی هاتووچۆوە.