توێژینەوەیەک: هەفتانە یەک هێلکە بخۆ، تووشی زەهایمەر نابیت

ئاڤا نیوز

هێلکە وەک پێکهاتەیەکی سەرەکیی بەیانیان هەمیشە سوودبەخش بووە، بەڵام لەم دواییانە توێژینەوەیەک دەریخستووە خواردنی لانیکەم یەک هێلکە لە هەفتەیەکدا ئەگەری هەیە تووشبوون بە نەخۆشی زەهایمەر کەم بکاتەوە.

ئەوەی لەبارەیەوە دەگوترێت: خواردنی یەک هێلکە لە هەفتەیەک، ئەگەری هەیە تووشبوون بە نەخۆشی لەبیرچوونەوە 'زەهایمەر' بە ڕێژەی 47% کەم بکاتەوە بە بەراورد بەوانەی لە مانگێکدا کەمتر لە جارێک هێلکە دەخۆن. توێژینەوەیەکی دیکەش لە گۆڤاری زە جۆرناڵ ئۆف کلینیکاڵ نۆترەیشن بڵاو کراوەتەوە كە خواردنی هێلکە نە تەنیا مەترسی تووشبوون بە نەخۆشی زەهایمەر کەم دەکاتەوە، بەڵکو پەیوەندی بە کەمبوونەوەی کەڵەکەبوونی پڕۆتینی ژەهراویشەوە هەیە کە هۆكارە بۆ نەخۆشیی مێشک.

زانیاریی زیاتر: توێژەران سوودەكانی هێلکە دەگەڕێننەوە بۆ پێکهاتە گرنگەکانی وەک کۆڵین و ترشە چەورییەکانی ئۆمیگا سێ کە ڕۆڵیان هەیە لە پشتگیریکردنی چالاكییەكانی دەمار و تەندروستی مێشک.

پێدراوە ڕاستەکان: شارەزایانی بواری خۆراک ئامۆژگاری دەکەن، هێلکە پاڵپشتی تەندروستیی مێشك دەکات بەتایبەت بۆ کەسانی بەساڵاچوو و دەتوانێت یارمەتیدەر بێت بۆ نەخۆشییەکانی لەبیرچوونەوە.