کاتی دابەشکردنی مووچەی مامۆستایانی گرێبەست ئاشکرا دەکرێت

ئاڤا نیوز

 

نوێنەری مامۆستایانی گرێبەست دەڵێت، بڕیارە مووچەی مامۆستایانی گرێبەستی سەر بە وەزارەتەکانی پەروەردە و خوێندنی باڵا هەفتەی داهاتوو لە داهاتی ناوخۆ دابەش بکرێت.

 

لێدوانی فەرمی: عەلی ڕەئوف، نوێنەری مامۆستایانی گرێبەست بە ئاڤا میدیای ڕاگەیاند: وەزارەتی دارایی و ئابووری پێی ڕاگەیاندین، کە لەگەڵ میلاک ناتوانن مووچەی گرێبەستەکان خەرج بکەن، بەڵکو ڕۆژی سێشەممەی هەفتەی داهاتوو مووچەی مامۆستایانی گرێبەست دابەش دەکرێت.

 

زانیاریی زیاتر: 42 هەزار و 33 مامۆستای گرێبەست هەیە، کە 37 هەزار و 939 مامۆستایان سەربە وەزارەتی پەروەردەیە، هەروەها چوار هەزار و 100 مامۆستای سەربە وەزارەتی خوێندنی باڵایە.

 

ئەوەی پێویستە بیزانیت: تێچووی مووچەی مامۆستایانی گرێبەست زیاتر لە 24 ملیار دینارە و لەسەر داهاتی ناوخۆیە.

 

لەلایەکی دیکە: وەزارەتی دارایی و ئابووریی هەرێمی کوردستان ڕایگەیاند، بڕی 974 ملیار دینار خرایە سەر هەژماری بانکی وەزارەتەکەیان و بڕیارە سبەی دەست بە دابەشکردنی مووچە بکرێت.

 

بەگوێرەی ئەو خشتەیەی بڵاوکرایەوە، لە سێ ڕۆژدا و لە ڕۆژانی هەینی، شەممە و یەکشەممە مووچەی سەرجەم دەستە و وەزارەتەکان دابەش دەکرێت.