فەرەنسا دان بە دەوڵەتی فەڵەستیندا دەنێت

ئاڤا نیوز

سەرۆکی فەرەنسا، لە بەیاننامەیەکدا کە پابەندبوونی مێژوویی وڵاتەکەی بۆ ئاشتییەکی دادپەروەرانە و بەردەوام لە ڕۆژهەڵاتی ناوەڕاست دووپات دەکاتەوە، بڕیاری فەرمی وڵاتەکەی بۆ داننان بە دەوڵەتی فەڵەستیندا ڕاگەیاند.

نووسراوی فەرمی: لە نووسراوەکەی ئیمانوێل ماکرۆن، سەرۆکی فەرەنسادا هاتووە، بە وەفاداری بۆ پابەندبوونی مێژوویی فەرەنسا بۆ ئاشتییەکی دادپەروەرانە و بەردەوام لە ڕۆژهەڵاتی ناوەڕاست، "من بڕیارم دا کە فەرەنسا دان بە دەوڵەتی فەڵەستیندا بنێت".

سەرۆکی فەرەنسا جەختی لەسەر پێویستیی خێرای وەستانی شەڕ لە غەززە و گەیاندنی هاوکاری بە دانیشتووانی سڤیل کردەوە و وتی: "ئاشتی ئەگەری هەیە."

بۆ گەیشتن بەم ئامانجە، فەرەنسا داوای کردووە، ئاگربەستی دەستبەجێ بکرێت، سەرجەم بارمتەکان ئازادبکرێت، هاوکارییە مرۆییەکان بە دانیشتوانی غەززە بگەیێنرێت، دڵنیابوونەوە لە چەکداماڵینی حەماس، دابینکردنی ئاسایش و ئاوەدانکردنەوەی غەززە. 

لە درێژەی بەیاننامەکەدا، ئاماژە بەوە کراوە کە دەبێت دەوڵەتی فەڵەستین دابمەزرێت و توانای مانەوەی مسۆگەر بکرێت، بە مەرجێک چەکداماڵینی خۆی قبووڵ بکات و دان بە ئیسرائیلدا بنێت، بەمەش بەشدار دەبێت لە ئاسایشی هەمووان لە ڕۆژهەڵاتی ناوەڕاست.

ئاماژەبەوەشکراوە، لە میانی کۆبوونەوەی گشتی نەتەوە یەکگرتووەکان لە مانگی نۆی ئەمساڵدا فەرەنسا دان بە دەوڵەتبوونی فەلەستین دەنێت.

لەلایەکی دیکەوە: پێش چەند ڕۆژێک ئیسپانیاش داکۆکی لە دامەزراندنی دەوڵەتی فەلەستین کرد و وتی، ئەو دەوڵەتە ئاسایش بۆ ئیسرائیلیش بەدی دەهێنێت. 

بۆچی گرنگە: داننانی دەوڵەتان بە سەربەخۆیی فەلەستین ڕێخۆشکەر دەبێت بۆ جێبەجێکردنی چارەسەری دوو دەوڵەت کە لەسەر ئاستی نێودەوڵەتی وەک چارەسەری نموونەیی کێشەی نێوان ئیسرائیل و فەلەستین سەیر دەکرێت.