هەواڵێک بۆ خانمان؛ ئەم ڤیتامینانە بخۆن و خۆتان لە نەخۆشی بەدوور بگرن

ئاڤا نیوز

 

ڤیتامینەکان پێکهاتەیەکی سەرەکیین بۆ ئەوەی تەندروستیی جەستەی مرۆڤ پارێزراو بێت، بەڵام خانمان جیاوازتر لە پیاوان پێویستیان بە جۆرێکی دیاریکراوی ڤیتامین هەیە. پزیشکێکی ئافرەتان جۆرەکانی دەخاتەڕوو.

 

لێدوانی فەرمی: دکتۆر ئیدیلیا ئورفانۆڤا, پزیشکی ئافرەتان دەڵێت، جەستەی ئافرەت لە هەر تەمەنێکدا بێت پێویستی بە پاڵپشتی هەیە بەتایبەتی لە ماوەی هەڵاوسانی هۆرمۆنەکان، فشاری دەروونی، هۆکارە ژینگەییەکان و شێوازی ژیانی چالاک، هەڵبژاردنی ڤیتامینی گونجاو  یارمەتیدەر دەبێت بۆ پاراستنی جوانی و گەنجی و بەرزکردنەوەی تەندروستی گشتی و باشترکردنی کوالیتی ژیان.

 

بەگوتەی دکتۆر ئیدیلیا ئورفانۆڤا, پزیشکی ئافرەتان ئەو ڤیتامینانەی پێویستن ئەمانەن:

 

٠ڤیتامین ئەی: توخمێکی سەرەکییە بۆ جەستەیەکی تەندروست، بەشدارە لە دووبارە دروستبوونەوەی خانەکان و پرۆسەی پیربوون خاو دەکاتەوە و بینین باشتر دەکات و کاریگەری ئەرێنی لەسەر تەندروستیی پێست و قژ دەبێت.

 

٠ڤیتامین سی: سیستمی بەرگریی لەش بەرز دەکاتەوە و یارمەتی بەرەنگاربوونەوەی سەرما و نەخۆشییە درێژخایەنەکان دەدات، لەش نەتوانێت بە تەنیا ڤیتامین سی بەرهەم بهیێنێت، باشترە خواردنی سەوزە و میوەی تازە زۆر بخۆرێت.

 

٠ڤیتامین دی: پاڵپشتی سیستمی بەرگریی لەش دەکات و هەوکردن کەم دەکاتەوە، ئەگەری تووشبوون بە شێرپەنجە کەم دەکاتەوە و ئێسکەکان بەهێز دەکات، ئەمەش یارمەتیدەرە بۆ ڕێگریکردن لە پووکانەوەی ئێسک، ڕۆڵی هەیە لە پاراستنی پێست لە پیربوونی پێشوەختە، هاوکات لە کاتی دووگیانیدا ڕۆڵێکی گرنگ دەگێڕێت لە پشتگیریکردنی گەشەی کۆرپەلە.

 

٠ڤیتامین ئی: خانمان پێویستیان بەم جۆرە هەیە، چونکە بەشدارە لە پرۆسەی هێلکەدان و پێگەیشتنی هێلکە.

 

وریا بە: هۆشداریش دەدرێت هەڵبژاردنی ڤیتامینەکان، پێویستە لەژێر چاودێریی پزیشکدا وەربگیرێن و بخورێن.