وەزارەتی پەروەردە: زانیاریی زیاتر لە دوو ملیۆن کەس لە ئی-پەروەردە تۆمار کراوە

ئاڤا نیوز

 

وەزارەتی پەروەردەی هەرێمی کوردستان ڕاگەیاند، داتا و زانیاریی زیاتر لە دوو ملیۆن کەس لە مامۆستا و فەرمانبەر و قوتابییان لە سیستمی ئی پەروەردە تۆمار کردووە.

وێنە گەورەکە: لە چوارچێوەی پلان و هەنگاوەکانی حکومەتی هەرێمی کوردستان لە کابینەی نۆیەم بۆ بە دیجتاڵیکردنی کاروبارەکانی وەزارەت و فەرمانگەکانی حکومەت، وەزارەتی پەروەردە سیستمی ئی-پەروەردەی جێبەجێکرد، لە ڕێگەیەوە کاروبارەکانی وەزارتەکە بەشێوەی ئەلیکترۆنی جێبەجێ دەکات.

بابەتە ستراتیژییەکان: سیستمی ئی-پەروەردە سیستمێکی ئەلیکترۆنییە و چەندین خزمەتگوازاریی لەخۆگرتووە وەک (ئی-وانە، وەرگێڕانی بڕوانامە، هەڵسەنگاندنی دەرەکی قوتابخانەکان، گواستنەوەی قوتابیان)، کاروبارەکانی وەزارەتەکە لە ڕێگەی ئەو خزمەتگوزارییە دیجتاڵییانە دەکرێت، هەر قوتابی و مامۆستا و فەرمانبەرێک وشەی بەکارهێنەر و تێپەڕی تایبەتی خۆی دەتوانێت سوود لەو خزمەتگوازییانە وەربگرێت.

لێدوانی فەرمی: زوهێر محەممەد، یاریدەری بەڕێوەبەری گشتیی پلاندانانی پەروەردەیی لە وەزارەتی پەروەردە بە ئاڤا میدیای گوت: لە ساڵی 2019ەوە کار بە سیستمی ئی-پەروەردە دەکرێت و داتای زیاتر لە دوو ملیۆن کەس لە مامۆستا و فەرمانبەر و قوتابییان بە تەواوی وردەکاریی لەو سیسمتە تۆمار کراون.

خاڵە ئەرێنییەکان: سەرجەم مامەڵەکانی قوتابی و فەرمانبەر و مامۆستایان بەشێوەی ئەلیکترۆنی دەکرێت، تێچووی هاتووچۆ و کاتیش دەگەڕێنێتەوە و هەموو بەڵگەنامەکانیش لە سیستمەکە دیکۆمێنت دەکرێن.

گۆشەیەکی دیکەی دیمەنەکە: یاریدەری بەڕێوەبەری گشتیی پلاندانانی پەروەردەیی دەڵێت : بەهۆی بڵاوکردنەوە وەڵامی نمونەیی پرسیارەکانی پۆلی دوازدەی ئامادەیی و بینینی کاغەزی سۆمای قوتابییان لە دوای ئەنجامدانی تاقیکردنەوەکان، ئەمساڵ ڕێژەی ناڕەزایی و پەڵپ لەلایەن قوتابییان کەمتر بووە.