سەرۆکوەزیران بارزانی: سبەی بڕیارێک لە بەرژەوەندیی خەڵک دەدەین

ئاڤا نیوز

سەرۆکوەزیران بارزانی ڕایدەگەیێنێت، سبەی لە کۆبوونەوەی ئەنجوومەنی وەزیران بڕیارێک لە بەرژەوەندیی خەڵک دەدەن.

وێنە گەورەکە: سبەی چوارشەممە کۆبوونەوەی هەفتانەی ئەنجوومەنی وەزیرانە و تاوتوێکردنی پرسی مووچە و دابەشکردنی و چارەسەرکردنی کێشەکان لەگەڵ بەغدا لە تەوەرە سەرەکییەکان دەبن.

چیرۆکی سەرەکی: سەرۆکوەزیران مەسرور بارزانی ئێوارەی ئەمڕۆ لە مزگەوتێکی شاری هەولێر لەگەڵ ژمارەیەک کەسایەتی و هاونیشتمانی بەشداری لە ڕێوڕەسمێکی بەربانگکردنەوە کرد، گوتارێکی لەبارەی دۆخی هەرێمی کوردستان پێشکەش کرد و سوپاسی خۆڕاگری خەڵکی کرد.

لێدوانی فەرمی: سەرۆکوەزیران بارزانی لە گوتارەکەیدا داوای لە حیزب و لایەنەکان کرد "واز لە بەرژەوەندیی شەخسی و حیزبی خۆیان بهێنن" و هەوڵی یەکڕیزی بدەن لەپێناو دابینکردنی ماف و بەرژەوەندییەکانی خەڵک..

بابەتی ستراتیژی: سەرۆکوەزیران بارزانی باسی لەوە کرد "بەرەیەک دروست بووە دەیانەوێت هەموو کێشە و قەزیەی گەلی کوردستان بکەن بە مووچە، دڵنیام زۆربەی خەڵک لەگەڵ ئەم بۆچوونە نییە، ئێمە کێشەی نەتەوە و ناسنامە و خاکمان هەیە، دەمانەوێت ڕێز لە خوێنی شەهیدان و خەبات و پاراستنی ئەم ئەزموونە بگرین".

لەلایەکی دیکەوە: لە کۆتایی قسەکانیدا سەرۆکوەزیران بارزانی پەیامێکی ناڕاستەوخۆی بۆ لایەنە سیاسییەکان نارد و گوتی: "هەمیشە لە وەختی خۆشیدا هاوڕێمان زۆرە، بەڵام لە ناخۆشی و تەنگانەدا خۆمان زۆر تەنیا دەبینین، سبەی لە کۆبوونەوەی ئەنجوومەنی وەزیران بڕیارێک لە بەرژەوەندیی خەڵک دەدەین و دڵنیام هەمووان دەبنە هاوبەشی ئەو بڕیارە".