سۆمۆ بۆ یەکەمجار ئاشکرای دەکات لە بەسرە قاچاخچێتی بە نەوتەوە دەکرێت

ئاڤا نیوز

وەزارەتی نەوتی عێراق دەڵێت، لە دوو بەندەری پارێزگای بەسڕە لە باشووری وڵات ژمارەیەک کەشتیی تۆمارکراون کە بەشێوەی نهێنیی و بەبێ مۆڵەت نەوتیان بارکردووە، بۆ ئەو مەبەستەش تەکنیکی پێشکەوتوویان بۆ یاریکردن داتەکانی تایبەت بە دیاریکردنی ناسنامەکانیان بەکارهێناوە، ئەویش بۆ شاردنەوەی شوێنی ڕاستەقینە و گۆڕینی ڕێڕەوەکانیان.

وێنە گەورەکە: ماوەیەکە باس لەوەدەکرێت ئەمریکا، عێراق تۆمەتبار دەکات بە تێکەڵکردنی نەوتی ئێرانی لەگەڵ ئەو نەوتەی خۆی هەناردەی بازارەکانی جیهانی دەکات و دەیفرۆشێت، دەسەڵاتدارانی عێراقیش بە فەرمی ئەو تۆمەتە ڕەتدەکەنەوە، بۆیەش کۆمپانیای سۆمۆ نوسراوەکەی ئاڕاستەی دەسەڵاتەکانی ئەمنیی عێراق کردووە بۆ گرتنەبەری ڕێکاری پێویست.

نوسراوی فەرمی: بەگوێرەی نوسراوێکی 27ی ئەم مانگەی کۆمپانیای بە بازارکردنی نەوتی عێراق "سۆمۆ" کە گەورە بەرپرسێکی وەزارەتی نەوت دروستی نوسراوەکەی بۆ ئاڤا میدیا پشتڕاستکردەوە، ئاماژە بەوەکراوە، لەهەردوو بەندەری ئوم قەسر و خۆر زوبێر و لە چوارچێوەی ئاوە هەرێمییەکانی عێراق، ژمارەیەک کەشتی گواستنەوەی نەوت تۆمارکراون کە هەستاون بە بارکردنی نەوت بۆ بازارەکانی جیهان بەشێوەی نهێنیی و بەبێ مۆڵەت.

ئەوەشی خستووەتەڕوو، داتاکان ئاماژە بەوە دەکەن یاری بە داتاکانی سیستمی دیاریکردنی ناسنامەی ئەو کەشتییانە کراوە تا شوێنی ڕاستەقینە و ڕێڕەوەکانیان بشارنەوە، هەروەها لە ئاشکراکردنی زانیاریی لەبارەی کەشتییەکان و ئاڕاستەکانیان خۆیان دواخستووە ئەوەش دەچێتە چوارچێوەی چالاکی پڕ مەترسییەوە و گومانی ئەوەی لێدەکرێت لە چالاکی نایاسایی تێوەگلابن، وەک دەستکاریکردنی سیستەمی بەدواداچوون و ئەنجامدانی گواستنەوەی بێ مۆڵەت.

کۆمپانیای بە بازارکردنی نەوتی عێراق "سۆمۆ" دەشڵێت، ئەو کەشتییانە لەناو لیستی باوەڕپێکراو و پێشوەختی کۆمپانیاکەیاندا نین بۆ گواستنەوەی نەوتی خاو، ئەوەش گومانەکان لەسەر یاساییبوونی چالاکییەکانیان زیاتر دەکات.