نەتەوە یەکگرتووەکان داوایەک ئاڕاستەی ڕۆژئاوای کوردستان و سووریا دەکات

ئاڤا نیوز

نێردەی تایبەتی نەتەوە یەکگرتووەکان بۆ سووریا داوا لە ئیدارەی ڕۆژئاوای کوردستان و دیمەشق دەکات سازش بۆ یەکتری بکەن و متمانە لەگەڵ یەکتریدا دروستبکەن، تا بەر لە کۆتایی ئەمساڵ لەبارەی تێکەڵکردنەوەی دامەزراوەکان و کێشەکانی دیکەیان بگەنە ڕێککەوتن.

وێنە گەورەکە: لە چوارچێوەی بەردەوامی کۆبوونەوەکانی نێوانیان، لەم هەفتەیەدا شاندێکی حکومەتی سووریا سەردانی حەسەکەی ڕۆژئاوای کوردستانی کرد و لەبارەی گەرەنتی دروستنەبوونی گرژی سەربازیی و داهاتووی کارمەند و فەرمانبەرانی ئیدارەی خۆسەر، گفتوگۆی لەگەڵ شاندی هەرێمی باکوور و ڕۆژهەڵاتی سووریا کردووە.

لێدوانی فەرمی: گێر پێدرسۆن، نێردەی تایبەتی نەتەوە یەکگرتووەکان بۆ سووریا لە میانەی پێشکەشکردنی وتارێکدا لە کۆبوونەوەی ئەنجوومەنی ئاسایشی نێودەوڵەتی ئاماژەی بەوەشکرد، ڕێککەوتنەکەی 10ی ئازاری نێوان هەسەدە و دیمەشق سستی لە جێبەجێکردنیدا هەیە، بۆیەش گرنگە هەوڵەکان بۆ کۆبوونەوەکەی پاریس (لەنێوان هەسەدە و دیمەشق بە چاودێری ئەمریکا و فەڕەنسا) بەردەوام بن، هەردوولاش سازش بۆ یەکتری بکەن تا گفتوگۆکان بەرەو پێش بچن.

پەیوەست بە دۆخی سووریاش، پێدرسۆن دەڵێت، پرۆسەی قۆناغی ڕاگوزەر لە سووریا لە ژێر هەڕەشە دایە بەتایبەتیش دوای گرژییەکانی باشووری وڵاتەکە کە پێشێلکاری مەترسیدارییان تێدا تۆمارکرا، هاوکات تائێستاش بەشێک لە گرووپە چەکدارەکان لەژێر کۆنتڕۆڵی دەوڵەتدا نین بۆیە گرنگە چەک لەو گرووپانە وەربگیرێتەوە، جەختیشی کردەوە لەسەر ئەوەی پرۆسەی سیاسی لەو وڵاتەدا ناتەواوە، ئەویش بەهۆی لاوازی متمانە، سنوورداری بەشداریکردن و نەبوونی ڕاوێژی ڕاستەقینە لەسەر کۆی پرسەکان.