پەیامی نوێی سوودانیی لەبارەی هێرشە درۆنییەکانی سەر هەرێمی کوردستان

ئاڤا نیوز

سەرۆکوەزیرانی عێراق ڕایگەیاند، تائێستا زیاتر لە 29 هەوڵی هەڵدانی مووشەک و هێرشی درۆنییان لەناوخۆی وڵاتدا پوچەڵکردووەتەوە و بە هاوکاری هەرێمی کوردستان و هاوپەیمانی نێودەوڵەتیش، هەوڵەکان بۆ ئاشکراکردنی ئەو لایەنە بەردەوامە کە "هێرشە تیرۆرستییەکان" ئەنجام دەدات.

چیرۆکی سەرەکی: دوێنێ لیژنە باڵاکەی حکومەتی عێراق بۆ لێکۆڵینەوە لەبارەی هێرشە درۆنییەکان، سەردانی هەرێمی کوردستانی کرد و دوای کۆبوونەوەشی لەگەڵ لایەنە پەیوەندیدارەکانی کوردستان، بڕیاریدا ڕاسپاردەی خۆی لەبارەی هێرشەکان بۆ محەممەد شیاع سوودانی، فەرماندەی گشتی هێزە چەکدارەکان بەرزبکاتەوە.

لێدوانی فەرمی: محەممەد شیاع سوودانی، سەرۆکوەزیرانی عێراق ئەمڕۆ سێشەممە بە ئاژانسی ئەسیۆ شەیتید پرێس (ئەی پی)ی ڕاگەیاندووە، "پێداگرین لەسەر ئەوەی هیچ پاساوێک نەدەین بە هیچ لایەنێک کە عێراق بکاتە ئامانج و لەم شەڕەدا تێوەی بگلێنێت، هەروەها ڕێگە بە هیچ لایەنێک نادەین خاکی عێراق بۆ کردەی سەربازیی بەکاربهێنێت و ئارامی وڵات بخاتە مەترسییەوە".

ئەوەشی خستووەتەڕوو، "لەم بوارەدا زیاتر لە 29 هەوڵی هەڵدانی موشەک و هێرشی درۆنییمان پوچەڵکردووەتەوە، پێویستیشە دەوڵەت ئاسایشی وڵات لەئەستۆ بگرێت بۆیەش هیچ پاساوێک بۆ هەڵگرتنی چەک نییە، بۆ ئاشکراکردنی هێرشە درۆنییەکانیش ئێمە هەوڵدەدەین تواناکانمان گەشەپێبدەین بۆ ئاشکراکردنی جۆری درۆنەکان و شوێنی هەڵدانیان و گرتنەبەری ڕێکاری پێویست دژیان".

سوودانی کە هاوکات فەرماندەی گشتی هێزە چەکدارەکانیشە دەڵێت، لەم بوارەدا لیژنەیەکی باڵای ئەمنی هاوبەشیان لەگەڵ حکومەتی هەرێمی کوردستان پێکهێناوە و هەماهەنگیشیان لەگەڵ هاوپەیمانان هەیە، ئەویش "بە ئامانجی دیاریکردنی ئەو لایانەی ئەو هێرشە تیرۆرستییانەی ئەنجامداوە ".