وەزارەتی پێشمەرگە و هاوپەیمانان ناوچەی سەركردایەتیی سەربازی و 11 فیرقەی پیادە ڕێكدەخەنەوە

ئاڤا نیوز

هەوڵەكان بۆ ڕێكخستنەوەی كارەكانی ناوچەی سەركردایەتیی سەربازی و 11 فیرقەی پیادەی سەر بە وەزارەتی پێشمەرگە، بەهەماهەنگیی لەگەڵ ڕاوێژكارانی سەربازیی هاوپەیمانان، بەردەوامی هەیە. هاوكات لیستی هاوكاریی مانگی حەوتی لیوا هاوبەشەكان ڕادەستی هاوپەیمانان كراوە و ئاڤا زانیویەتی كۆتایی ئەم هەفتەیە یاخود سەرەتای هەفتەی داهاتوو، پارەكە دەگات.

چیرۆكی سەرەكی: سەرۆكی ئەركانی وەزارەتی پێشمەرگە، پێشوازیی لە كۆڵۆنێڵ سال، فەرماندەی هێزەكانی هاوپەیمانان لە هەرێمی كوردستان كرد، لە دیدارێكدا دووپات لە پاڵپشتی و هاوكاریی دارایی و لۆجستیی هاوپەیمانان بۆ هێزی پێشمەرگە كرایەوە.

ڕاگەیێنراوی فەرمی: بەپێی ڕاگەیێنراوی وەزارەتی پێشمەرگە، لە چوارچێوەی پرۆسەی چاكسازی و ڕێكخستنەوەی هێزی پێشمەرگەی كوردستان، هەوڵەكان بۆ جێبەجێكردنی كارەكانی فەرماندەیی دەڤەرەكان، بەهەماهەنگیی ڕاوێژكارانی سەربازیی هاوپەیمانان، بەردەوامی هەیە، ئامانجەكە ئەوەیە؛ ناوچەی سەركردایەتیی سەربازی و 11 فیرقەی پیادە ڕێكبخرێنەوە.

بە تەنیشت ئەم بابەتەوە: دوای ڕادەستكردنی لیستی هاوكاریی مانگی حەوتی لیوا هاوبەشەكانی پیادە بە هێزەكانی هاوپەیمانان، پێشبینی دەكرێت كۆتایی ئەم هەفتەیە یاخود سەرەتای هەفتەی داهاتوو پارەكە بگات و بخرێتە سەر هەژماری بانكیی هێزەكانی پیادە لە وەزارەتی پێشمەرگە.