نەتەوەیەکگرتووەکان: خراپترین سیناریۆی برسێتی لە غەززە ڕوودەدات

ئاڤا نیوز

ڕوانگەی سەرەکی ئاسایشی خۆراکی سەربە نەتەوەیەکگرتووەکان دۆخی ئێستای غەززە بە "خراپترین سیناریۆی برسێتی" ناو دەبات و ڕێگچارەیەک دەخاتەڕوو.

 

وێنە گەورەکە: بە پشتبەستن بە نوێترین ڕاپۆرتەکان، دۆخی غەززە لەوپەڕی کارەساتباریدایە و قەیرانێکی مرۆیی قووڵ ناوچەکەی گرتووەتەوە، هێرشەکانی ئیسرائیل تا ئێستاش بەردەوامن و بووەتە هۆی کوژرانی دەیان هەزار کەسی مەدەنی، کە زۆربەیان ژن و منداڵن، هەروەها وێرانکارییەکی زۆری ژێرخانی ئابووری لێکەوتۆتەوە.

 

بڵاوکراوەی فەرمی: ڕوانگەی سەرەکی ئاسایشی خۆراکی سەربە نەتەوەیەکگرتووەکان لە بڵاوکراوەیەکی فەرمیدا هۆشداری دەدات، کە کەرتی غەززە ڕووبەڕووی "خراپترین سیناریۆی برسێتی" بووەتەوە و جەخت لەوە دەکاتەوە کە گواستنەوەی هاوکارییە مرۆییەکان لە ڕێگەی دەروازە وشکانییەکانەوە "کاریگەرتر و سەلامەتر و خێراترە" بۆ چارەسەرکردنی قەیرانە مرۆییە کارەساتبارەکەی غەززە.

 

زانیاریی زیاتر: بەپێی ڕوانگەی جیهانیی چاودێریکردنی ئاسایشی خۆراک  کە لەلایەن نەتەوە یەکگرتووەکانەوە پشتیووانی دەکرێت، "خراپترین سیناریۆی برسێتی" لە ئێستادا لە کەرتی غەززە لە ئارادایە، ڕێکخراوەکە هۆشداری داوە کە فڕێدانی هاوکارییەکان لە ئاسمانەوە بەس نییە بۆ کۆتایهێنان بە کارەساتە مرۆییەکە و تەنها دەستڕاگەیشتنی دەستبەجێ و بێبەربەستی هاوکارییەکان بۆ غەززە دەتوانێت ڕێگری لە برسێتی و مردنی بەربڵاو بگرێت.