نەتەوە یەکگرتووەکان: ڕێژەی منداڵبوون لە عێراق بە بەراورد بە حەفتاکان بۆ نیوە دابەزیوە

ئاڤا نیوز

ڕاوێژکارێکی سندوقی نەتەوە یەکگرتووەکان بۆ دانیشتووان، دابەزینی ڕێژەی منداڵبوونی لە عێراق ڕاگەیاند کە بە بەراورد بە ساڵانی حەفتاکان بۆ نیوە دابەزیوە.

ڕاگەیێنراوی فەرمی: مەهدی عەڵاق، ڕاوێژکاری سندوقی نەتەوە یەکگرتووەکان بۆ دانیشتووان، ڕایگەیاند: عێراق هێشتا وەک یەکێک لەو وڵاتانە پۆلێن دەکرێت کە گەشەی دانیشتووانیان بەرزە، بەڵام دابەزینێکی بەرچاو لە ڕێژەی منداڵبوون بەدی دەکرێت، بەتایبەت دوای ڕاگەیاندنی ئەنجامەکانی سەرژمێری گشتیی دانیشتووان.

عەلاق ئاماژەی بەوەشکرد، ڕێژەی منداڵبوون لەهەر خێزانێکدا لە نێوان سێ بۆ چوار منداڵدایە، لەکاتێکدا لە حەفتاکانی سەدەی ڕابردوودا لە حەوت منداڵ زیاتر بوو، هاوکات ئێستا خێزانەکان هۆشیارن سەبارەت بە گرنگیی دوورخستنەوەی ماوەی نێوان منداڵبوون و وەزارەتی تەندروستیش ڕۆڵێکی دیاری هەبووە لە داڕشتنی بەرنامەکانی ڕێکخستنی خێزاندا.

ئەوەی پێویستە بیزانیت: بەپێی کۆتا سەرژمێری گشتیی عێراق کە لە ساڵی 2024 بەڕێوەچوو، کۆی گشتیی ژمارەی دانیشتووانی عێراق زیاتر لە 45 ملێۆن کەسە، لەو ژمارەیەشدا 22 ملیۆن و 784 هەزار و 62 کەس لە ڕەگەزی نێرن. هەروەها 22 ملیۆن و 623 هەزار و 833 کەس لە ڕەگەزی مێن.