ترەمپ دەیەوێت ئازەربایجان و وڵاتانی ئاسیا بچنە نێو ڕێككەوتنی ئیبراهیمـیەوە

ئاڤا نیوز

 

ئیدارەی ترەمپ دەیەوێت ئازەربایجان و وڵاتانی ئاسیا بچنە نێو ڕێککەوتنەکانی ئیبراهیمی، بە گوتەی ترەمپ ''ئامانجی ڕێککەوتنەکە لەسەر پتەوکردنی پەیوەندییەکانە نەوەک ئاساییکردنەوەی پەیوەندییە دیپلۆماسییەکان''

 

زانیاریی بەدەستهاتوو: پێنج سەرچاوەی ئاگادار بەبێ ئاشکراکردنی ناوەکانیان بە ڕۆیتەرزیان گوتووە، ''ئیدارەی ترەمپ چالاکانە لەگەڵ ئازەربایجان گفتوگۆ دەکات سەبارەت بە ئەگەری بەشداریکردنی ئازەربایجان و بەشێک لە هاوپەیمانەکانی لە ئاسیای ناوەڕاست لە ڕێککەوتنەکانی  ئیبراهیمی، بەو هیوایەی پەیوەندییەکانی ئێستای لەگەڵ ئیسرائیل بەهێزتر بکات''

 

سەرچاوەکانی ڕۆیتەرز دەشڵێن، ئازەربایجان و هەموو وڵاتانی ئاسیای ناوەڕاست لە ئێستاوە پەیوەندییەکی درێژخایەنیان لەگەڵ ئیسرائیل هەیە، لە ئەگەری فراوانکردنی ڕێککەوتنەکان ئەوا دەبێتە هەنگاوێکی ڕەمزی و پەیوەندییەکانیان لە بوارەکانی وەک هاوکاریی بازرگانی و سەربازی پتەو دەکات.

 

باکگراوند: ڕێككەوتنی ئیبراهیمی، بریتییە لە كۆمەڵێك ڕێككەوتنی ئاشتی لە نێوان ئیسرائیل و وڵاتانی عەرەبی بە سەرپەرشتیی ئەمەریكا کە لە ساڵی 2020 لە یەکەم خولی سەرۆکایەتیی ترەمپدا واژۆ کراوە، چوار وڵاتی زۆرینەی موسڵمان ڕێککەوتن لەسەر ئاساییکردنەوەی پەیوەندییە دیپلۆماسییەکانیان لەگەڵ ئیسرائیل دوای نێوەندگیریی ئەمریکا.